Тәуелсіздік алған жылы Сыр елінде туған жас маман түрлі байқауларда алдыңғы шептен көрініп жүр

Айдана – қызылордалық жас теміржолшылардың көшбасшысы. Тұла бойынан жігер мен батылдық, ақыл мен парасат, өмірге деген құштарлық, адамгершілік пен қарапайымдылық есіп тұратын қыз қашан да айналасына жастарды үйіріп, түрлі бастамаларға мұрындық болып жүреді.

Бүгінде Қызылорда магистральдық желі бөлімшесінің персоналды басқару бөлімін басқаратын тәуелсіздік құрдасы Айдана Нұрмашқызы сонау студент кезінде, 2010 жылы компания президентінің «Магистраль» бағдарламасы бойынша атаулы стипендиясының иегері болды.

– Болашаққа нық қадам жасауға бағыт пен бағдар, мотивация берген өзімнің сүйікті компаниямның алғашқы стипендианты болғанымды әркез мақтанышпен айтып жүремін. Б.Момышұлы атамыздың «мүмкіндігіңнен мақсатың жоғары болсын» деген ұстанымымен жүретін маған бұл атаулы стипендия үлкен жігер мен сенімділік сыйлады. Сол жылдары «Теміржолшылардың әлеуметтік жағдайы» атты тақырыппен республикалық ғылыми жобаға қатысып, жетістіктерге жеттім. 2013 жылы туған жерім Сыр еліне қызыл дипломмен оралып, осы салада қызметімді бастадым, – дейді Айдана.

Компанияның жастарды қолдау саясатына араласатын Айдана жыл сайын жас теміржолшылар арасында ұйымдастырылатын байқаулардан жүлдесіз қалған емес. Мәселен, 2017 жылы «Жас кәсіби маман» байқауында 3-дәрежелі дипломмен, 2019 жылы «Жастар жылына» орай «100 жас есім» төсбелгісімен марапатталды. Компаниядағы кадрлық және әлеуметтік саясаттың дамуына қосқан үлесі үшін «Үздік маман» атанды.

– Биыл Компания маған тағы бір үлкен мүмкіндік берді, «HR сертификаттау орталығының» ұйымдастыруымен өткен 3 айлық HR мамандарын квалификациялау курсына қатыстым. Маған 3 жылға «HR профессионал» дәрежесі берілді. Ондағы алған білім мен тәжірибемді жұмыс барысында пайдаланып, жаңа жетістіктерге жететініме сенімдімін, ол өз қолымызда, – дейді кейіпкеріміз.