Жарасымды жанұя бақыты
Қызылорда облысы бойынша меншікті тілші
Тартоғай станциясында теміржолшылар отбасында өмірге келген Гүлшат жастай осы саланың қыр-сырын зердеге түйіп өсті. Әке-шешесінің жол бойындағы тынымсыз тіршілігі ерте есейтіп қана қоймай, болашақ мамандығын осы саладан таңдауына да әсерін тигізгені анық.
Әкесі Расул Әміржанұлы мен анасы Сәбира Тұрсынбайқызы – жол бойындағы шағын бекетте зейнетке шыққанша еңбек еткен қарапайым теміржолшылар барлық балаларын еңбекке баулып өсірді.
Ата-ана кәсібін әулетте бірнеше бала жалғады. Жылдар өтіп, Гүлшат Нұрлыбек Дәужігітов есімді теміржолшы жігітке тұрмысқа шығып, енесі Баян Нұрабаева да осы саланың майталманы боларын ол кезде ешкім білмеді, әрине...
Гүлшат мектепті бітірген соң теміржол колледжін бітіріп, Бақтысай бекетіне станция кезекшісі болып орналасып, еңбек жолын бастайды. Жұмыстан қол үзбей, Алматы көлік академиясын сырт- тай оқып, жоғары білім алды. Тұрмыс құрып, бірінен соң бірі өмірге бес бала келді. Жолдасы Нұрлыбек екеуі біріне бірі қолдау жасап, қатардан қалмай еңбек етулеріне енесінің ықпалы зор болғанын Гүлшат жасырмайды. Өзі де теміржолшы болған соң баласы мен келініне әрі ұстаз, әрі қамқор ана, отбасының ұйытқысы бола білген Баян Нұрабаева олардың саланың нағыз маманы болып қалыптасуы үшін зейнетке шыққан соң немерелерінің күтімі мен тәрбиесін өз қолына алды. Ерлі-зайыптылардың алаңсыз жұмыс жасауына жағдай жасады.
Әйел – қашан да шаңырақтың ұйытқысы. Ене мен келін жарасқан жарасымды жанұяның бақыты – желкілдеп өсіп келе жатқан балалар.