Адалдық – өмірлік ұстанымы

Еліміздегі ірі тораптық станция – Павлодарда жиырма жыл станциялық диспетчер болып жұмыс істейтін Эрик Сүлейменовті әріптестері өте талапшыл, сауатты, білікті ұйымдастырушы деп біледі. Кейіпкеріміздің жалпы темір жол саласындағы еңбек өтілі 30 жылдан асып жығылады. 

Эрик Кәрімұлы Павлодардағы №6 СПТУ оқу орнын бітіріп, теміржол саласындағы еңбек жолын Тың темір жолына қарасты Павлодар-Оңтүстік станциясында пойыз құрастырушының көмекшісі болып бастаған. Екі жылдан соң пойыз құрастырушы болды. Бұдан кейінгі жылдары тәжірибе жинақтап, электрлік орталықтандыру қосынының кезекшісі, станция кезекшісі жұмыстарын атқарды.  2002 жылдың 1-ші наурызынан бастап станциялық диспетчер қызметіне тағайындалып, күні бүгінге дейін еңбек етіп келеді.  

Станциялық диспетчер ретінде тәжірибесі мол маман жоғары ұйымдастырушылық қабілетінің арқасында күрделі өндірістік жағдайларда оңтайлы  шешім тауып, білімі мен біліктілігін көрсетіп келеді. Павлодар станциясының жұмысын тиімді ұйымдастыру оңай жұмыс емес. Ауысым бастығы ретінде пойыздардың қозғалыс қауіпсіздігін қамтамасыз етуге айрықша көңіл бөліп, еңбек қорғау және қауіпсіздік техникасы талаптарының сақталуын, еңбек және өндірстік тәртіпті нығайту, кадрларды тәрбиелеу мәселелерін назардан тыс қалдырған емес. 

Эрик Сүлейменов станциялық диспетчер ретінде жиырма жылдық тәжірибесі бар майталман маман бола тұра, жұмысына кіріскенде лауазымдық міндеттерін үлкен жауапкершілікпен адал атқаратынын айтады әріптестері. 

- Ол жұмысын өмірінің ажырамас бөлшегі ретінде қабылдайды, үнемі алдына өршіл мақсаттар қояды және соның нәтижесіне жету үшін аянбай еңбек етеді. Бұдан бөлек Эрик Кәрімұлы жылдар бойы жинаған тәжірибесін, білімін жастармен бөлісіп, олардың алға ұмтылысын көргенде қуанып, қолдау білдіреді. Сонысымен де жастарға ұнамды, ұжымға сыйлы, – деп жылы лебізін білдірді станция бастығы. 

Өмірде де, жұмыста да белсенді кәсіби маманның сенімді әрі нық іс-қимылының арқасында Павлодар станциясының негізгі көрсеткіштері көтеріңкі. Сөзімізге биылғы бес айдағы процентке шаққандағы көрсеткіштер дәлел болмақ. Мәселен, өңделген транзиттік және жергілікті вагондардың,  бір жүк операциясы астында вагонның тұруы, жұмыс паркі, вагон айналымы, жүкті тиеп және түсіру, стастикалық жүктеме сынды көрсеткіштер жоспары 100 пайыздан асыра орындалған. Бұл осы процестерді басқарып отырған станциялық диспетчердің жұмысты ұтқыр да ұтымды ұйымдастыра білуінің арқасы.