Берекелі отбасы – ел тірегі
Ақтөбе облысы бойынша меншікті тілші
Отбасы берік болса, елдің қорғаны мықты, тірлігі мығым болмақ. Ақтөбе облысында өткен «Мерейлі отбасы» байқауында көптің ықыласына бөленген бірлігі мен тірлігі жарасқан теміржолшылар жанұясымен таныс болыңыз.
Елімізде ырысы мен ынтымағы жарасқан осындай жанұяларды дәріптеу мақсатында жыл сайын өтетін «Мерейлі отбасы» сайысының қалалық кезеңінде қала әкімінің Алғыс хатын алған Аман Егізбаев қарт анасын жетектеп, жұбайы, балалары мен немерелерін соңына ертіп сахнаға шыққанда көпшілік қошеметпен қол соқты. Отбасы құндылықтарын насихаттап, өзара келісім мен жарасым тапқан жанұяның үлгісі салтанатты да сәнді еді.
«Мерейлі отбасы – 2023» ұлттық байқауының қалалық кезеңінде іріктеуден өткен теміржолшы Аман Егізбаевтың отбасы ел тәуелсіздігін алған жылдары Орынбордан қоныс аударған екен. Сырт елде туып өссе де ұлттық құндылықтарды ұстанып, қазақи тәрбиені бойына сіңірген әулеттің түпқазығы 80 жастағы қарт ана Мағия Егизбаева деп білдік.
«Біз Орынбордың қазағымыз. Ақтөбеге тәуелсіздік жылдары көшіп келдік. Балаларымыз өз елінде, ата жұртымызда өсіп-өнсін дедік. Сыртта жүрсек те әке-шешемізден көрген тәрбиеміз, әдет-ғұрып, салт-дәстүрді ұстанып, ұрпағымызға да сіңіріп өстік», – дейді Мағия әже.
Ал теміржол саласында 26 жылдан бері еңбек ететін ұлы Аман «Жолаушы тасымалы» АҚ-ның Батыс филиалында жұмыс істейді.
«Жұмысым өзіме ұнайды. Теміржолдағы еңбек жолымды пойыз механигі боп бастадым. Қазір жедел бөлім технигімін. Вагондарды тіркеп, батыс өңірінен шығатын пойыздарға қызмет көрсетеміз», – деді Аман Егізбаев.
Бала тәрбиесіне көп көңіл бөлетін отбасы екі ұл мен бір қызды өсіріп жеткізіп отыр. Осы байқауға да үлгілі отбасылар қатарында мектептің өтінішімен қатысыпты. Ұлдарының бірі банк саласында, екіншісі Ақтөбе рельс-арқалық зауытында жұмыс істейді. Отағасының айтуынша, отбасының беріктігі бала тәрбиесінен бастау алады.