Жол шебері «Құрметті теміржолшы» атағына ұсынылды

Атырау облысының Құрманғазы ауданы – мал өсіріп, егін салуға, жалпы айтқанда ауыл шаруашылығын дамытуға қолайлы өңір. Мұнда шағын өзендер мен көлдер де көп. Сулы, нулы жер. Біздің кейіпкеріміз Асқар Ертаев осы өңірде, ауыл шаруашылығы мамандарының отбасында дүниеге келген.

Дегенмен, оған тағдырын темір жолмен байланыстыру бұйырыпты. Ресейдің Астрахань облысымен шекаралас Котяевка селосының Крупская атындағы мектебін 1985 жылы бітірісімен көп ойланбай Гурьев теміржол техникумына оқуға түседі. 1988 жылы әскерден келген соң оқуын жалғастырып, оны 1990 жылы техник-жолшы мамандығы бойынша бітіріп шығады.  

Ганюшкино жол дистанциясында жол жөндеуші болып еңбек жолын бастаған жас маман бригадир, жол шебері, жол бапкері, жол өлшеу шебері сынды мектептен өтті. Қазіргі уақытта №7 телімнің жол шебері.  

«Асқар Ертаев сауатты маман. Әсіресе жол шаруашылығында «Oliver Wyman» тәсілін жүзеге асыру бойынша инфрақұрылымды басқару мен пайдаланудың жаңа жүйесін тиімді енгізуге зор үлес қосты. Нәтижесінде 2 128 түйіспе мен рельстердің ақауы жойылды, жол сапасы жақсарды, жолдың жоғарғы бөлігінің материалдары үнемделіп, пойыздың жүрісі жақсарды. Оның учаскесі ескі шпалдардан тұратын, күрделі жөндеу уақыты өтіп кеткен телім бола тұра жол сапасы «жақсы» деген бағаға ие. Сондай-ақ Асқардың телімінде қоршау салынбаған, соған қарамастан ол малдың жолға шығып кетуіне жол бермей отыр. Оның жігіттері жауапты жұмыс істейді, жолды қадағалап отырады», – дейді Атырау магистральдық желі бөлімшесі бастығының міндетін атқарушы А.Рахмеденов.  

Ісінде береке, сөзінде адалдық, жұмысында жауапкершілікті ұстанған Асқар Қайыржанұлын биыл басшылық «Құрметті теміржолшы» атағына ұсыныпты.  Ұжымдастары оны ол атаққа әбден лайық деп санайды. 1996 жылы отбасын құрған жолшы жігіт – бүгінде екі бала тәрбиелеп отырған берекелі шаңырақтың иесі.