Еңбек ер атандырды

Маңғыстау жол дистанциясында тапжылмай 23 жылдан бері еңбек етіп келе жатқан жолшы Қабыл Зайыров биылғы төл мерекеге орай саланың ең жоғары наградасымен марапатталмақ.

Ақтөбе теміржол колледжінде арнаулы кәсіптік орта білім алған кейіпкеріміз  2000 жылы Маңғыстау жол дистанциясына жол монтері болып жұмысқа орналасқан.  Осы жылдар ішінде жол шаруашылығының барлық сатысынан өтті, жол бапкері, жол шебері болды. 2011 жылдан бастап дистанцияға қарасты алты телімнің бірінде, №2 телім бастығы.  

– Біз өндіріске келген жылдары телімде негізінен ағаш шпал еді, бірте-бірте темірбетонға ауыстырылды. Маған қарасты 88 шақырымдық телімдегі жолдар 2019 жылдан бастап үш жылда толық жаңарды. Қазіргі таңда телімде 58 жұмысшы бар, оның ішінде 44 жол монтері, 5 жол шебері, технолог, техниктер, т.б. мамандар бар. Біздің телімге Шетпе станциясы, №13, 14, 15, 16 бекеттер қарайды. Осы телімде күзетпелі 1, күзетпесіз 6 өткел бар. Бұрынғыдай емес қазір жолшылардың еңбек жағдайы жасалған. Отыратын «табельный» ғимаратымыз Шетпеде. Ол жерде тамақ ішетін, киім ауыстыратын, душ қабылдайтын орындар қарастырылған. Енді перегондарда модульдер орнату жоспары басшылық тарапынан көтеріліп жүр. Онда тіпті тамаша болады. Жалақы тұрақты, әлеуметтік пакеттер қарастырылғандықтан кадр тұрақсыздығы жоқ, дегенмен біздің жұмысқа үйрену үшін, әсіресе түбектің ауа райында  үлкен шыдамдылық пен төзімділік керек, – дейді кейіпкеріміз.

Қабыл Бекарысұлы бұған дейін «Адал еңбегі үшін» төсбелгісімен және «Қазақстан темір жолына 110 жыл» мерейтойлық медальмен марапатталған. Енді олардың қатарын «Құрметті теміржолшы» белгісі толықтырмақ.