Пойыздар қозғалысын тиімді басқарып отырған білікті диспетчер

Батыстағы бес облыстың пойыздар қозғалысын ұйымдастырып отырған Ақтөбеде диспетчерлік орталықтың жұмысы өте күрделі де қауырт. Ауысым басшысы Қайрат Қалуов цифрлық трансформация арқылы интернетке тәуелсіз жұмыс жасап тұрған орталық жұмысымен таныстырды.

Ақтөбе, Атырау, Батыс Қазақстан, Маңғыстау және Қызылорда облыстарындағы пойыздар қозғалысын басқаруды бір жерден ұйымдастырып отырған орталық диспетчерлер қазір саны көбейген контейнерлік пойыздарды кідіртпей отыр.  

– Мұнда бүгінде 180 пойыздың қозғалысы ұйымдастырылады. Бір ауысымда 26 пойыз диспетчері, төрт бөлім кезекшісі, төрт локомотив диспетчері және бір ауысым басшысы бар, – дейді ауысым басшысы.  

Айтуынша, биылғы жылы контейнерлік пойыздар ағыны екі есеге артқан. Еуропа-Қытай-Еуропа бағытындағы контейнерлік пойыздар күн сайын өтуде және орташа салмағы мен ұзындығы артып, жылдамдығы да айтарлықтай жақсарған. Қытайдан шыққан пойыздар да Қазақстан арқылы өтеді.  

– Әр пойыз құрамында 70 вагоннан бар. Бұрын тәулігіне он пойыз өтсе, қазір 20-ға жеткен. Соңғы үш жылдықта Қазақстан мен Қытай, Ресей темір жолының арасында байланыс нық орнады. Пойыздар үлкен жылдамдықпен жүреді. Тальго пойызынан кейін контейнерлік пойыздарды өткіземіз. Жүк пойыздарында жылдамдық 70 болса, контейнерлік пойыздарда 100 болады, – деді Қайрат Қалуов.  

«ҚТЖ» ҰК» АҚ «Ақтөбе магистральдық желі бөлімшесі» филиалы пойыздар қозғалысын басқару орталығының ДЦУ ауысым бастығы Қайрат Зейнуллаұлы тәжірибелі маман. 1961 жылы Шалқар өңірінде дүниеге келген ол еңбек жолын Қарашоқат станциясының 77 разъезде станция кезекшісі болып бастапты.  – Қазір мұнда жұмыс қайнап жатыр. Бұрын бес өңір қосылмай тұрғанда Ақтөбенің өзінде қиыншылық болды. Мына тұрған Орал мен Қызылордаға пойыз жіберуде кедергі көп болды. Қазір бәрі орталықтан басқарылып, ұйымдастыру жеңілдеді, – деді Қайрат Қалуов.  

Кейіпкеріміз теміржолшылар әулетінің өкілі, бүгінде өз балалары да династиялық дәстүрді жалғастыруда.