Аралдық теміржолшы Астана төрінде марапатталды

«ҚТЖ-Жолаушы локомотивтері» ЖШС Сексеуіл аймағы бойынша бастығы Бауыржан Аяғанов «Құрметті теміржолшы» атанды. Мәртебелі төсбелгіні астана төрінде алған кейіпкеріміз теміржолшылар әулетінің көшін бастаған азамат.

Сыр өңірінде Аралдың Сазды ауылында туған Бауыржан Әлімұлы 1985 жылы Қызылорда қаласындағы темір жол техникумын тепловоз шаруашылығы мамандығы бойынша бітіріп, еңбек жолын Сексеуіл локомотив депосында бастаған. ТҚК-3 цехының бригадирі болып жұмысқа төселе бастағанда әскер қатарына шақырылып, 1985- 1987 жылдар аралығында Беларусь жерінде Әскери әуе күштері қатарында Отан алдындағы борышын өтейді. Елге келген соң жұмысын жалғастырады. ТҚК-2 цехы ауысым шебері, дайындау цехының аға шебері қызметтерін атқарады. 2004-2016 жылдары Қазалы локомотив сервис орталығы, Сексеуіл бөлімі бойынша инженер-электрші, жетекші инженер-технолог болып еңбек етеді. 2016-2021 жыл аралығында Сексеуіл локомотив пайдалану депосында жетекші инженер технолог болады. 2021 жылдан бері Жолаушы локомотивтерінде еңбек етеді.  

Темір жол саласында қызмет атқару барысында тепловоз құрал-саймандарына рационализаторлық жаңашылдықтар енгізіп, өндірістік жетістіктерімен көзге түскен. 2019 жылдың қорытындысы бойынша Арал ауданында «Жылдың үздік теміржолшысы» атағына ие болған. 2021 жылы «Түрксіб-90» мерекелік төсбелгісімен, 2022 жылы «ҚТЖ» ҰК» АҚ-ның 25 жылдық мерейтойлық төсбелгісімен марапатталды.

– Саланы дамытуға қосқан еңбегімнің еленгені шығар, рахмет, – деп қысқа қайырды марапат иесін мәртебелі атағымен құттықтағанымызда. Бүгінде кейіпкеріміздің ұлы Еркебұлан Аяғанов әке жолын қуып Сексеуіл локомотив пайдалану депосы бастығының орынбасары қызметін атқарады. Сонымен қатар Арал аудандық мәслихатының депутаты ретінде елдің жағдайын жасауға атсалысуда.