Еңбекпен өрілген өмір
Кезінде кеңестер одағы деген алып елде таңдаулы 100 сұрыптау станциясының бірі болған Арысты кім білмейді?! Теміржолшы кәсібі де бұл өңірге ерте сіңген. Сонау өткен ғасырдың басында Орынбор – Ташкент шойынжолы тартылып, арыстықтар теміржолшы кәсібін меңгере бастады.
Бір ғасырда тоғыз жолдың торабындағы Арыс станциясы теміржолшылар қаласына айналды. Біздің кейіпкеріміз Арысбек Тастанбеков 1953 жылы 2 қыркүйекте Арыс станциясының іргесіндегі Ақпан бекетінде теміржолшы отбасында дүниеге келген сәтте-ақ оның болашақ тағдыры айқындалып қойған секілді, темір жол бойында өскен теміржолшының ұлы әрине теміржолшы болады.
1972 жылы теміржол техникумын бітіріп келіп, Шымкент белгі беру және байланыс дистанциясына электр монтері болып еңбек жолын бастаған кейіпкеріміз мықты маман болу үшін орта білім жеткіліксіз екенін түсініп, қозғалыс саласы бойынша сырттай оқып, жоғары білім алады.
1979 жылы Бадам станциясына кезекші болып барып, сосын бөлімшенің қозғалыс бөлімінде пойыз диспетчері, бөлімше бойынша кезекші қызметтеріне сатылай өсіп, алты жыл жемісті еңбек етеді, мол тәжірибе жинайды.
Әрине, бөлімшенің бүкіл пойыздар қозғалысын ұйымдастыру, негізгі көрсеткіш – пойыздар жылдамдығын арттыру жұмыстарының қорытындысы осы диспетчерлік аппараттың жұмысымен анықталатыны белгілі. Осы жылдар ішінде өзін қозғалыс қызметінің қыр-сырына жетік мықты маман ретінде танытқан Арысбек Тастанбековті басшылық 1984 жылы Арыс станциясының бас инженері етіп тағайындайды.
– Сол жылдары Арыс станциясында жаңа технологияларды енгізу жұмыстары қызу жүргізіліп жатқан болатын. Осы жұмыстарға жетекшілік жасап, бөлімше бастығы Әуезхан Салықбаевтың тапсырмасымен өндірісті техниканың соңғы жетістіктерімен қайта жарақтандыру жұмыстарына атсалыстық. 1989 жылы Арыс станциясының бастығы болып тағайындалған соң үш жыл тікелей Әуезхан ағамыздың қол астында жұмыс істеп, көп тәрбиесін алдым, – деп еске алады кейіпкеріміз.
Теміржолшының одан кейінгі қызметі Шымкент бөлімшесінде жалғасады. 1991-1997 жылдары бөлімшеде қозғалыс қауіпсіздігінің бас ревизоры лауазымын атқарады. Ал ҚТЖ құрылған соң «Түркістан темір жолы» басқармасының қозғалыс қызметін басқарды. Сосын Шымкент станциясының бастығы болып тағайындалған Тастанбековті бір күні жоғары басшылық шақырып алып жұмысы шатқаяқтап жатқан Алматы темір жол бөлімшесінің Достық станциясына баруға ұсыныс жасайды. 2000-2007 жылдары қиырдағы шекаралық станцияны басқарып, көршілес қытайлық әріптестерімен тамаша байланыс орната білген Тастанбековтің іскерлігі өз алдына әңгімеге арқау боларлық. Содан кейін солтүстікке қоныс аударып, Көкшетаудың Бурабай курорты станциясын, Жамбыл станциясында Жүк департаментін, ерекше статусы бар Шымкенттің Қазығұрт станциясын басқаруы да өзі үшін ерекше тәжірибе болғанын айтады.
Саладағы қырық жылға жуық еңбегі туған жерге оралып, «Қазтеміртранс» АҚ Шымкент филиалында бас инженер, директордың орынбасары қызметтерін атқарумен аяқталады. Басқа еңбегін былай қойғанда 5 өңірде станция басқарыпты. Бүгінде зейнет жасында, ұзақ жылғы еңбектің жемісін көріп, жұбайы Гүлнар екеуі ұл-қыздан тараған немерелердің қызығын қызықтап отырған жайы бар. Жетпіс жасқа толып отырған тарлан теміржолшы Арыстан басталып, әр қиырда жалғасқан еңбек жолының осылай өрілгеніне дән риза.
– Бір ғана Қазақстанның бірнеше өңірінде қызмет атқарып, талай жердің дәм-тұзын таттым. Қырық градус ыстық Арыс станциясы мен қырық градус суық Бурабай станциясында тұрып еңбек етудің қандай болатынын мен ғана білемін, – деп рахаттана күлді кейіпкеріміз.
Меруерт ЕСЕНБЕКҚЫЗЫ, Шымкент