Берлинге жеткен жауынгер

Ақтөбеде жалғыз теміржолшы соғыс ардагері бар. Ұлы Отан соғысының ардагері Василий Грецкий 100 жаста. Ғасыр жасаған қария 40 жылдан аса уақыт теміржол саласында еңбек еткен. Бүгінгі таңда Хромтау қаласында тұрады.

Кешегі қарт теміржолшы Василий Грецкий әлі тың, соғыс жылдарын, тіпті балалық шағын еске алып әңгіме айтады.  

«Бала күнімізде Жамбыл облысына қарасты Шу колхозында тұрдық. 18 жасқа толғанда әскерге шақырылып, Алматыда алты ай дайындықтан өттім. Кейін майданға аттандық, мен пулеметші болдым. Воронеж облысындағы Лиски станциясында пойызға жау әскері тұтқиылдан шабуыл жасап, бірталай адам қаза болды. Аман қалғандар Мәскеу арқылы Брянск ормандарында жүріп жатқан ұрысқа жіберілді», – деп еске алады ғасыр жасаған қария.  

Майдангер ұрыс алаңында үш рет жараланып, контузия да алған. Беларусь, Украина, Польша мен Чехословакиядағы қиян-кескі соғысқа қатысып, 1944 жылдың күзінде мемлекеттік «Қызыл жұлдыз» орденіне ұсынылып, кейін II дәрежелі Отан соғысы орденімен марапатталған.  

Василий Иванович Жеңісті Берлиннің іргесінде орналасқан ауруханада қарсы алыпты. 1946 жылы соғыста алған жарақаттарына байланысты демобилизацияланып, елге оралды. Соғыстан кейін 40 жылдан астам уақыт теміржол саласында қызмет етіп, зейнетке шықты. Отбасын құрып, 3 бала өсіріп, бүгінде олардан 6 немере мен 13 шөбере сүйіп отыр. Көп жылдан бері Василий Грецкийдің 2 баласы Челябіде тұрады. Ал кенже қызы Хромтауға қоныстанған. 2001 жылы қария осы баласының қолына көшіп келіп, бүгінде қызының жанында немерелерінің қамқорлығында қамсыз қарттық ғұмыр кешуде.