Түбектің тарлан теміржолшысы құрметті демалысына шықты
![](https://rail-news.kz/uploads/2024/08/15/6UKfN1reBbLc0ZN5JFuXbVl8DdfA3106cKaiIbEt.jpg)
![](https://rail-news.kz/img/noimg.png)
Маңғыстау облысы бойынша меншікті тілші
Түбек темір жолында қырық жылға жуық тер төккен Маңғыстау магистральдық желі бөлімшесінің директоры Мұхтар Бақтыгереевті әріптестері зейнеттік демалысқа шығарып салды.
Астанадан арнайы келген «ҚТЖ» ҰҚ» АҚ – Магистральдық желі дирекциясының Бас инженері Қайырбай Орынбаев Мұхтар Бақтыгереевтің көп жылдық еңбегі мен теміржол саласына қосқан үлесі зор екенін жеткізіп, Дирекция басшылығы атынан Алғыс хатын беріп, қазақы дәстүрмен иығына шапан жапты. Мұхтар Бақытұлымен талай жыл бірге қызмет еткен әріптестері сөз алып, естеліктерімен бөлісті, тарлан теміржолшының түбек теміржолына сіңірген еңбегін жоғары бағалады.
Мұхтар Бақтыгереев түбек теміржолындағы еңбек жолын 1984 жылы Батыс Қазақстан темір жолының Маңғышлақ жол дистанциясында жол монтері болып бастаған. Содан бері түрлі еңбек сатысынан өтіп, қарапайым жолшыдан басшылық деңгейге дейін көтерілді. Өзінің білімі мен тәжірибесін Маңғыстаудағы баяғы Р-43 рельсін ауыр салмақты рельске ауыстыру, Ақтау, Құрық порттарының Құрық-Ералы теміржол желісін іске қосу сынды өзекті мәселелерді шешуге жұмсап, қажырлы еңбек еткен жан Маңғыстау бөлімшесін ашу жөніндегі ынталы топтың белді мүшесі болыпты. Өзеннен Болашақ арқылы Түркіменстанға дейін және Бейнеу-Шалқар, Боржақты-Ерсай теміржолын іске қосуда ұйымдастырушылық қабілетімен ерекше көзге түсіп, аталған жобалардың ойдағыдай жүзеге асуына атсалысқан еңбегі арқасында «Адал еңбегі үшін» төсбелгісін тағып, 2016 жылы Құрметті теміржолшы атанған. 2018 жылғы «Үздік басшы» номинациясына ие болды.
Мұхтар Бақтыгереев барша әріптестері мен жоғары басшылыққа көрсетіліп отырған сый-құрмет үшін шын жүректен алғысын жеткізіп, еңбекте табысты болыңыздар деген тілегін білдірді.