Адал еңбек өтеуі

Мерейі биік мереке аясында «Ерен еңбегі үшін» медалімен марапатталған теміржолшылардың бірі – Шу станциясындағы вагондарға техникалық қызмет көрсету пунктінің вагондарды тексеріп-жөндеушісі Төрехан Чолпанбаев.

Теміржолда он сегіз жылдан бері еңбек етіп келе жатқан Төрехан Әбітайұлы: «Бұл марапат – «Адал азамат – Адал еңбек – Адал табыс» қағидатының іс-жүзіндегі көрінісі», – дейді.  

Шу – тоғыз жолдың торабындағы қала. Сан тарапты жалғап жатқан шойын жолдар да осы жерде түйіседі. Содан да болар, тұрғындарының басым көпшілігі тұрақты кәсіп ретінде теміржолда еңбек етуді дәстүрге айналдырған. Шудың іргесіндегі Жаңажол ауылында туып-өскен Төрехан Әбітайұлы да теміржолдан ұзап, басқа салаға кете алмағанын айтады. Ол саладағы еңбек жолын құрылыс бригадасынан бастапты. 2006 жылы Жамбыл магистральдық желі бөлімшесіне жұмысшы болып қабылданыпты.  

– Мектепті бітірген соң әскери борышымды өтеуге аттандым. Әскерден келіп, №11 автомектепке оқуға қабыл дандым. Темір тұлпарды тізгіндесем де, теміржол саласына жұмысқа ауысуды ойлап жүргенмін. 2006 жылы теміржол бойындағы құрылыс бригадасына қосылдым. Бес жылдан кейін ВЧД-27 Жамбыл вагон пайдалану депосына жылжымалы құрамның слесарі болып ауыстым. 2013 жылдан бері вагон қараушымын, – дейді Төрехан Чолпанбаев.  

«ҚТЖ-Жүк тасымалы» ЖШС «Жамбыл ЖТ бөлімшесі» филиалы Шу станциясының вагондарға техникалық қызмет көрсету пунктінің қырағы вагон қараушысы осы жазда жүк пойызының вагонынан ақау тауып, қауіптің алдын алған болатын. Жүк және жолаушылар пойыздарының діттеген жеріне аман-есен жетуіне өз үлесін қосып келе жатқан Төрехан Чолпанбаев бұған дейін де бірнеше мәрте вагонның бүйір жақтау рамаларының жарылғанын анықтаған.