Нұрлыбектің алғашқы жеңісі

Қазалы вагон пайдалану депосының вагон қараушы-жөндеушісі Нұрлыбек Әбуов қазан айының алғашқы күндері Сексеуіл станциясына келіп тоқтаған жүк вагонынан жарықшақ ақауды анықтап, апаттың алдын алды.

Ымырт үйіріле бастаған апақ-сапақ уақытта мұндай ақауды анықтау оңай емес еді. Ол вагон қараушының қырағылығы мен тәжірибесін көрсетеді. 2 қазанда кешкілік станцияға тоқтаған №3240 пойызының 93539070 нөмірлі жүк вагонының 14-94233-2004 таңбалы бүйір рамасының екінші арбасының оң жағынан, жүріс бағытында техникалық саңылау ішінен өтетін ось қорабының үстінен анықталған ұзындығы 105 мм жарықшақ жауапты тұлғалардың кеңесінен кейін расталып, вагон жылжымалы құрамнан ажыратылды.  

Жалпы Қазалы вагон пайдалану депосының вагон қараушыларының мұндай ақауды анықтап, пойыздарды кез келген қауіптен аман алып қалуы бірінші рет емес. Депода кіл шеберлер мен тәжірибелі вагоншылар мектебі қалыптасқандықтан ақаулы вагон жұмысына аса жауапкершілікпен қарайтын қырағы вагоншылардың назарынан тыс қалмайды.  

Депоның Сексеуіл техникалық қызмет көрсету пунктінде он жыл вагон қараушы болып жұмыс істейтін Нұрлыбектің бұл анықтап отырған алғашқы ақауы екен. Сексеуіл техникалық қызмет көрсету пунктінің басшысы Қайрат Ысқақов 34 жастағы вагон қараушының жауапкершілігінің арқасында болуы мүмкін апаттың жолы кесілгенін хабарлап, Нұрлыбекті құттықтап қолын қысты. Сексеуіл халқына жақсы таныс машинист Сұраған қарияның ұлы Нұрлыбек кәсібін жақсы көретінін және мақтан тұтатынын жеткізді.  

– Бұл – менің вагоннан тапқан ең бірінші ақауым. Сондықтан оны алғашқы жеңісім деп қабылдадым. Теміржолшының баласы ретінде өзімнің бұл салада тектен-текке жүрмегенімді түсіндім, – дейді вагон қараушы жігіт.