Тәуелсіздік құрдастары

Тәуелсіздік жылдары туғандар да қазір отыздан асып барады. Олардың өз ортасында жетістікке жеткендері қаншама. Маңғыстау теміржолында еңбек ететін ерлі-зайыпты Толыбаевтар жанұясы – соның жарқын үлгісі.  

Дәулет пен Салтанат түбек теміржолында қол ұстаса жүріп абыроймен еңбек етіп келеді. Ерлі-зайыптының отбасылық өмірі де келісті, тең құрбыларының арасында сыйлы, ортасына өнеге болып жүрген жастар.  

1992 жылы туған Дәулет Толыбаевты түбек теміржолшылары жақсы біледі, 2022 жылы ҚТЖ компаниясының «100 жас есім» жобасына енген, 2021 жылы жүк пойызын жүрізіп келе жатып үлкен апаттың алдын алып, «Қозғалыс қауіпсіздігі үшін» белісімен марапатталған  машинист. Ол Маңғыстау – Сайөтес бөлігінде пойыз жүргізіп келе жатып, №14-15 бекет арасын жаңбыр суы шайып кеткенін алыстан байқайды. Пойызды жедел тоқтатып, диспетчерге оқиғаны баяндайды. Сондай-ақ дереу артта келе жатқан қалған пойыздарға хабарлап, өзге машинистерге де ескертеді. Сондай қырағылықтың арқасында пойыз діттеген жеріне кешігіп жетсе де қауіптің алды алынған еді.  

Ал 1993 жылы дүниеге келген Салтанат түбек теміржолына келген   алғашқы күндерден жайдарманшылар қатарында өнер көрсеткен. Өткен жылы ҚТЖ көлемінде өткен «Менің мамандығым – менің тағдырым» байқауында бақ сынап, жеңімпаздар қатарынан көрініп, үшінші орынды иемденді. Теміржолшылар әулетінен шыққан ару жастайынан саладағы сан түрлі сұрақтың жауабын үйдегі әкесі мен жақын аға-әпкелерінен естіп, мамандыққа ертеден машықтанған. Алматыдағы теміржол академиясын қызыл дипломмен тәмамдап келген жас маманды түбек теміржолы бірден жұмысқа қабылдап, Жаңаөзен станциясында кезекші жанындағы оператор міндетін сеніп тапсырады. Кейін бірінші класты Маңғыстау станциясына ауысып, қазірге дейін сол жерде жүк қабылдап-тапсырушы. Темір жолдағы жастар саясатына араласып, жастар форумдарына қатысып, өзге де тең құрбыларын соған шақырып жүргенде өзінің өмірлік серігін жолықтырды. Жас жұбайлардың жарасымды шаңырағында төрт бүлдіршін өсіп келеді.