ЦЖС аруы Қызылордада тұрады

Майра Бадрақова – тоғыз жүз жылдық тарихы бар теміржолшылар әулетінің мүшесі. Теміржол саласында ерекше орны бар Қызылорда өңірінің теміржолшысы, «ҚТЖ» ҰК» АҚ-Қызылорда магистральдық желі бөлімшесіне қарасты Қызылорда жол дистанциясының еңбек қорғау және техникалық қауіпсіздік жөніндегі жетекші инженері Майра Мырзаханқызы 2025 жылдың ЦЖС аруы атанды. Оның еңбек жолы, кәсіби біліктілігі мен отбасылық тарихы Қазақстан теміржол саласының дамуындағы ерекше белгі.

Майра Бадрақова – тек теміржол саласында ғана емес, өзінің отбасында да ерекше орны бар адам. Ол Бадрақ әулетінің төртінші ұрпағы. Бадрақовтар әулетінің теміржол саласымен байланысы тереңде жатыр, ғасырлар бойы бұл әулет еліміздің теміржол саласының дамуына үлес қосып келеді. Майра ханым осы әулеттен шыққан алғашқы теміржолшы әйел. Оның еңбек өтілі 33 жылға жуықтапты, бұл уақыт ішінде ол теміржол қауіпсіздігі мен жұмысшылардың еңбек жағдайларын жақсартуда үлкен жұмыс атқарды.

Аймақтағы Бадрақовтар әулетінің теміржол саласындағы еңбек өтілі 900 жылға жуықтайды. Майра ханымның бұл салада жұмыс істей бастауы, оның тек отбасылық дәстүрін жалғастыруы ғана емес, елдің көлік инфрақұрылымын дамытуға қосқан елеулі үлесі де десек болады. Ол теміржолшылар қауымының үздік өкілі ретінде әрдайым жұмысқа деген адалдығын, жауапкершілігін және еңбекқорлығын көрсетіп келеді.  

«Жетістіктеріміз тек кәсіби саламен ғана шектелмейді. 2022 жылы өткен «Теміржол аруы» байқауына қатысып 133 үміткердің арасынан «Самая креативная» номинациясын жеңіп алған болатынмын. Бұл шығармашылық қабілетімнің, жаңашыл ой мен еңбекқорлықтың жемісі. Бұл тек менің ғана емес, осындай деңгейге жетуіме көмек берген әріптестерімнің, отбасы мүшелерімнің, бауырларымның арқасында жеткен жетістік. Ал байқауда қолжеткізген жеңіс – тек кәсіби саладағы ғана емес, жалпы қоғамдағы құндылықтар жеңісін көрсетеді. Биылғы жылдың ЦЖС аруы атану оңай болған жоқ, бұл да бір шыдамдылық сынағы. Теміржол саласында қандай да бір қиындықты жеңу үшін, қауіпсіздікті қамтамасыз ету үшін кез-келген оңтайлы тәсілді таңдауға тура келеді. Дегенмен қандай жағдай болмасын теміржолшылардың қауіпсіздігі басты рөл ойнайтынын санамыздан шығара алмаймыз. Мен әріптестерім жайлы осындай ұстанымда болғандықтан олар да мені қолдады, ерекше қамқорлық көрсеткендері үшін рахмет айтамын», – дейді ЦЖС аруы.

Қызылорда жол дистанциясында қызмет ететін Майра ханым күнделікті жұмысында теміржол қауіпсіздігі мен жұмысшылардың денсаулығын қорғау үшін барлық күш-жігерін салады. Ол өзінің жұмысында адам өміріне және қауіпсіздікке үлкен мән береді, әрдайым тиімді шешімдер мен жаңа тәсілдер іздеп, сол арқылы теміржол саласын жақсартуға күш салады. Оның еңбегі тек Қызылорда бөлімшесінде ғана емес, бүкіл Қазақстанның теміржол саласында жоғары бағаланады.

«Майра ханым үшін теміржол – бұл тек жұмыс емес, оның өмірінің бір бөлшегі. Ол теміржолшылар әулетінің тарихын жалғастырушы ғана емес, осы салада көптеген жаңашылдықтар мен жетістіктерге жеткен нағыз кәсіпқой. Оның өмір жолы мен еңбек өтілі жастар үшін зор үлгі. Ол өзінің үш баласына және екі немересіне өз өмірінің құндылықтарын, еңбекқорлығын және адалдықты үйретуде. Майра ханымның отбасы – оның күш-қуаты мен рухани негізі, ал теміржол саласындағы еңбек жолы қоғамға қосқан үлкен үлесі. Майра ханымның еңбегі тек кәсіби жетістіктерімен ғана емес, сонымен қатар әріптестеріне көрсеткен қамқорлығымен де ерекше. Оның жұмысы, сөзсіз, теміржол секторындағы қауіпсіздікті қамтамасыз етуде маңызды рөл атқарады. Майраның аты – еңбекқорлықтың, батылдықтың және ұрпақтар арасындағы байланыс пен мұраны сақтау идеалдарының символы. Бұл оның тек теміржол саласының маманы ретінде ғана емес, бүкіл теміржолшылар әулетінің қадірлі өкілі, осы салада үлкен із қалдыратын тұлға екенін білдіреді. Орынбор-Ташкент теміржолының құрылысында алғашқы жұмысшылардың ерен еңбегі. Майраның атасы да осы теміржолдың құрылысшысы болып өздерінің қарапайым тірлігімен үлкен тарихтың іргетасын қалады. Қазіргі таңда осы тарихи мұраны жалғастырып жүрген, теміржолшылар әулетінің ұрпағы болып табылатын ЦЖС аруы – Майра ханым сияқты тұлғалар өздерінің жұмысымен өткеннің қадірін, еңбекқорлығын әрі болашаққа деген жауапкершілікті терең сезінетін әріптесіміз», – дейді кәсіподақ ұйымының төрайымы Ғалия Ноғайбаева.

Майра Бадрақова тек теміржолшы ғана емес, қоғамның әрі рухани, әрі материалдық дамуына үлес қосқан тұлға. Ол өзінің әулетінің дәстүрін жалғастыра отырып, көптеген жылдар бойы теміржолшылар қауымына адал қызмет етті. Оның шығармашылық қабілеттері мен еңбекқорлығы оның осы саланың үздік өкілі болуына себепші болды. ЦЖС аруы ретінде ол өз кәсібі мен отбасылық құндылықтарын үйлестіріп, жастарға үлгі болып отыр. Майра ханым өз отбасын, кәсібін, Қазақстанның теміржол саласын мақтан тұтатын нағыз ару.