«Үздік еңбек әулеті» – Аягөзде

Абай еліндегі теміржолшылар биылғы «Еңбек жолы» конкурсына  белсенді түрде қатысты. Жыл сайын өткізілетін осынау дәстүрлі байқауда түрлі аталым бойынша жүлделі орын алып жүргендер аз емес. Ал биылғы жылғы «Үздік еңбек әулеті» номинациясы аягөздік теміржолшылар отбасына бұйырды.  

Жуырда облыс орталығы Семей қаласында «Еңбек жолы» байқауының өңірлік кезеңінің жеңімпаздарын марапаттау рәсімі өтті. Абай облысы бойынша конкурсқа өтінім қабылдау 21 сәуір мен 1 тамыз аралығында жүргізіліп, отызға жуық отбасы іріктелген. Конкурстық комиссия шешімімен өңірлік жеңімпаздар анықталып, Аягөз қаласында тұратын, кәсіби теміржолшылар саналатын Байғозовтар әулеті айқын басымдықпен «Үздік еңбек әулеті» номинациясын жеңіп алды.    

Әулеттің теміржол саласындағы жалпы еңбек өтілі 262 жылдан асады екен. Сала ардагері Қажияхмет Байғозов бүгінде әулеттің бастауында тұр. Оның үлгісімен отбасының бірнеше буыны тағдырын  теміржол саласымен байланыстырған. Қазіргі таңда Семей магистральдық желі бөлімшесі мен Алматы ЖТ бөлімшесі филиалында әулеттің төртінші буыны абыройлы еңбек етіп жүр. Екі  немересі Алматы теміржолында династияның даңқты жолын жалғастыруда.

Жалпы, бұл әулеттің теміржолдағы тарихы ғасырға жуық уақыт бұрын Өмірбай Байғозовтан бастау алады. Ол 1930 жылы құрылысы жүріп жатқан Түрксіб теміржолына жұмысқа орналасып, қырық жылдан астам уақытын осы салаға арнаған ардагер. Әкенің еңбек жолын үлкен ұлы Қажияхмет Байғозов жалғастырыпты. Қиыр Шығыста әскери борышын өтеп келгеннен кейін ол да теміржол саласына жұмысқа орналасады. Аягөз өңіріндегі жауапты жұмыста 34 жыл үзіліссіз еңбек ете жүріп, теміржол саласындағы бірнеше мамандықты меңгерді. Станция бастығы болды. Қадірмен ақсақал «Еңбек ардагері», «Тыл еңбеккері» медальдарымен марапатталған. Бүгінде ақсақал – үлкен әулеттің тірегі, кейінгі ұрпаққа еңбекқорлық пен адалдықтың айқын үлгісін көрсетіп отырған ардагер.

Облыс әкімдігінде өткен салтанатты жиын барысында ардагер теміржолшы кейінгі буын жастарға еңбекқорлық пен ел игілігі үшін қызмет ету жайында өсиет айтты.

– Менің Аягөздегі теміржол саласынан зейнетке шыққаныма 35 жыл болды. Әкем теміржолшы еді. Әке жолын жалғап, мен де өмір бойы теміржол саласында еңбек еттім. Алты баламның бесеуі жолымды жалғап, теміржолшы болды. Жастарға айтарым – қандай мамандықты таңдасаңдар да, еңбектерің адал болсын. Адал еңбек қашанда абыройға жеткізеді, – деді Қажияхмет Өмірбайұлы.

Әулет басшысы зайыбы Үмітхан Сембайқызымен бірге облыс әкімінің қолынан Алғыс хат алып, ақшалай-заттай сый-сияпатпен марапатталды.