Теміржолшы – мәртебелі мамандық

Қазақстан теміржолының дамуына бір кісідей үлес қосып жатқан әйелдер қауымының еңбегі ерен. Айжамал Амангелдиева Қазығұрт станциясында 36 жылдан бері тапжылмай еңбек етіп келеді. Шойын жолдың қызығы мен шыжығын қатар көріп келе жатқан ол бүгінде станцияға келген жүктерді қабылдап-тапсырудың шебері атанып, басшылардың өтінішімен жастарға «мастер-класс» өткізеді.

«Қазығұрт станциясында 23-тен астам кірме жол бар. Соған вагондарды кіргіземіз. Онда жүктерді түсіретін, тиейтін вагондар кіріп шығады. Біздің міндетіміз – жөнелтіліп жатқан клиенттердің жүк вагондарын қадағалау. Яғни клиенттер жүк түсіргеннен кейін вагонның қандай жағдайда тұрғанын тексерген соң барып қабылдап аламыз. Себебі, вагондар ақаусыз келіп, ақаусыз кетуі керек. Станцияда ақаумен кеткен жағдай болған емес. Басшымыз Тоқтасын Қалмырзаев бізден келіп-кетіп жатқан вагондардың сапасы мен жай-күйі ойдағыдай болғанын қатты талап етеді. Себебі, ережеге бағынған, қатаң тәртіпке негізделген теміржол жұмысы сонда ғана алға басып, мекеменің көрсеткіші артатынын әрбір теміржолшы жақсы түсінеді. Егер де вагондармен жіберіп жатқан жүгіміздің бір жері дұрыс байланбай қалса немесе бір жері сынып кететін болса, ол жол апаты немесе тағы басқа келеңсіздік болуы мүмкін. Сол үшін жүк бөлімі сауысқандай сақ, қырандай қырағылықпен жұмыс істеуі керек. Жүк тапсыратын адамдар көрмей, қадағаламай вагонды жайдан-жай жібермейміз», – деп сыр шертті Айжамал Саттарқызы.

Айжамал Амангелдиевамен бірге тағы да 2 жүк қабылдап-тапсырушы жұмыс істейді. Айтуынша, станцияда күніне 100-ден астам вагон түсіріліп, 30-40 вагонға жүк тиеледі. Мамандар осы келген вагондарды қабылдап үлгеруі керек. Станция интернетпен қамтылған, оның ішінде келіп, кетіп жатқан жүктерді АСУ ДКР жүйесі арқылы есебін жүргізіп отырады.

«Жұмысымыз қиын әрі қызықты. Мысалы, зейнетке 58 жасымда кетуім керек еді. Зейнет жасын ұлғайтуына байланысты әлі де бір жыл жұмыс істеуім қажет. Негізі осы зейнет жасын ұзартқаны дұрыс емес деп ойлаймын. Өйткені, теміржолда қателесуге болмайды. Қанша дегенмен жасымыз келіп қалды, мысалы, ашық вагондарға құбырлар артылады, біз сол жүктердің мұқият орналасқанын үстіне шығып көруіміз керек, ол мен үшін қиын. Бірақ соған қарамастан өзімізді қолға алып, тырысуымыз керек. Сол себепті әйел адамдар 58 жаста зейнетке шыққаны дұрыс қой деймін. Бұл – менің жеке ойым», – дейді аға жүк қабылдап-тапсырушы.

Станцияда теміржолшылар үшін жақсы жағдай жасалған. Жұмыс орындары жайлы да таза, қыста жылы. Асхана қажетті техникалар мен жабдықталған, сонымен қатар ерлер мен әйелдерге арналған жуынатын душ бар. Шипажай, курорттарға жолдама беріледі. «Медикермен» келісімшартқа отырған, денсаулықтарын да қарата алады.

«Теміржолшы – мәртебелі мамандық. Теміржол саласы ұнамаса кетіп қалар едім, ұнаған соң жүрмін. Теміржолшы болғанымызға мақтанамыз. Тек бір ғана өтінішіміз сол, жоғары жақтағы басшылар зейнеткерлік жасты қысқартса екен дейміз. Себебі осында 30 жылдан астам жұмыс істеп келе жатқан әйелдер бар», – деп көптің көкейінде жүрген өтініш-тілекті де жеткізді Айжамал Амангелдиева.