Кәнігі маманның шеберлігі жүк ауырлап, жұмыс көбейгенде білінеді
Ақтөбе облысы бойынша меншікті тілші
Дөң жүк станциясы Хромтау ауданының іргесінде орналасқан. Ел экономикасына кіріс әкеліп отырған өндірісті аумақта жұмыс көлемі жыл санап артып келеді. Комбинатта өндірілетін кеннің басым бөлігі станция арқылы Ақтөбе және Ақсу ферроқорытпа зауыттарына жеткізіледі. Еліміздегі ең ірі кәсіпорынның тасымал қызметін жауапкершілігіне алған Дөң станциясындағы тауар кассирі – газетіміздің мерекелік санында үздік теміржолшыға лайық кейіпкердің бірі. Гүләйім Божаева – жерасты байлығы мол Дөң бойында өскен қыз. Бүгінде өндірістік аймақтағы тәжірибелі теміржолшылардың бірі. 1981-1986 жылдары Алматы теміржол көлігі инженерлері институтын жүк тасымалын ұйымдастыру мамандығы бойынша бітірген. Алдымен Екібастұз станциясында кезекші болып еңбек жолын бастайды. 1988 -2011 жылдар аралығында Алтынтау станциясында жұмыс істеді. 2011 жылдан бастан Дөң станциясында тауар кассирі. Тау-кен байыту комбинатынан күніге жүздеген вагон тиеп отырған станция қызметкерлерінің әр күні қарбалас. Сондай ауыр да қауырт жұмыс Гүлайым секілді өр мінезді қайратты жандардың ғана қолынан келетін сияқты. «Теориялық білім мен тәжірибенің екі бөлек болатынын көзімізбен көрдік. Тәжірибелі теміржолшылардың ұстаханасынан өтіп ысылдық. Мамандықтың жауапкершілігін қызған еңбек майданында сезіндік. Қазір осы Дөң станциясында еңбек етіп жатқаныма 10 жыл. Өндірісті аумақтағы жүк станциясының жұмысы аса қауырт та жауапты», – дейді Гүләйім Божаева. Дөң станциясының тауар кассирі Көлік саласы қызметкерлерінің төл мерекесіне орай бірнеше жыл қатарынан басшылықтың Құрмет грамотасын иеленген. Биыл ол «Кәсібі бойынша үздік» төсбелгісіне лайық деп танылды.