550 жылдық еңбек өтілі бар әулеттің ұрпағы алдыңғы шепте
«Қазақстан теміржолшысы» газетінің тілшісі
«ҚТЖ 100 жаңа есім» жобасының қатысушысы Маржан Садықова – теміржолшы әулетінің үшінші буыны. Садықовтар отбасының теміржол саласындағы еңбек өтілі 550 жылды құрайды екен. «Менің атам биыл ақпан айында 98 жастан асқанда дүниеден озды. Ұлы Отан соғысының ардагері, көп балалы әке, темір жол саласына 48 жыл ғұмырын арнаған адам еді. Еңбек жолын қарапайым электромеханик болып бастап, станция бастығы қызметіне дейін көтерілді. «Ерен еңбегі үшін» медалімен, «Социалистік жарыстың жеңімпазы» белгісімен екі рет марапатталды. 8 бала тәрбиелеп, көзі тірісінде 25 немере, 45 шөбере, 2 шөпшек сүйді. Әкем Мұратхан көп жыл диспетчерлік байланыс инженері, электромеханик болып қызмет етсе, анам Гүлжан Үштөбе сигнализация және байланыс дистанциясында электромеханик болды. 2019 жылы «Адал еңбегі үшін» төсбелгісімен марапатталды», – дейді ол. Маржанның 2011 жылы Алматыдағы Абылай хан атындағы Қазақ халықаралық қатынастар және әлем тілдері университетінде «Халықаралық құқық» мамандығының 3 курсын оқып жүріп, практикалық жұмысын «Вокзал-сервис» АҚ-да өткізіпті. Тәжірибе жұмысынан соң студент қызға филиал басшысынан заң бөлімінің 1 санаттағы инженері қызметіне ұсыныс түсіп, теміржолшы кәсібі қанында бар ол жұмысқа тұрып, аз уақыт аралығында заң бөлімінің жетекші инженері қызметін меңгеріпті.
«2012 жылдан бастап «Жолаушылар тасымалы» АҚ-ның «Оңтүстік» аймақтық филиалында 1 санаттағы техникпін. Қызметім топтық жол жүру құжаттарын рәсімдеу, жолаушылар пойыздарының кешігуін, жаңа кестесін енгізу, алдын ала жолаушыларға жол жүру құжатын ашу. Ендігі мақсатым – теміржол саласы бойынша жоғары білім алып, өз ісімде үздік маман болу», – дейді кейіпкеріміз.
Маржан Садықова «Қазақстан темір жолы» ұлттық компаниясы жас мамандардың қызметтік сатыда өсуіне, жан-жақты ашылуына, білім көкжиегін кеңейтуге, креативті ойларын ортаға салуға, өздерін жан-жақты дамытуға мол мүмкіндіктер жасап жатқанын, игі шаралар корпоративтік құндылықтың жарқын көрінісі екенін айтады. Белсенді жас Компанияның жастар саясаты шеңберінде жүзеге асырып жатқан шараларының бел ортасынан табылады. 2013 жылы – «Жобамен жұмыс», 2014 жылы – «Жұмысшыларды жұмыстан шығару барысындағы минимизациялық қауіп-қатер» семинар-тренингтеріне қатысып, «Болашақ менеджер» курсын да тәмамдаған. Ал биыл «Жүз жаңа есім» жобасына қатысып отыр. Маржанның арманы көп. Ең басты арманы – теміржолшы әулетінің абыройын асқақтатып, атасы салып, әкесі жалғастырған теміржолшы кәсібіне адал болып, саланың дамуына өз үлесін қосу.