Қызылорда вокзалында қауіпсіздік акциясы өтті
Қызылорда облысы бойынша меншікті тілші
Қызылорда теміржол вокзалында көліктегі жазатайым оқиғалардың алдын алу мақсатында өткен «Көліктегі қауіпсіздік» акциясына «Аманат» партиясының Теміржол филиалы мен ерікті жастар қатысты.
Қызылорда станциясының желілік полиция бөлімі ұйымдастырған шара аясында жолаушыларға теміржолдағы жүріс-тұрыс ережелерінің арнайы жадынамалары таратылып, түсіндіру жұмыстары жүргізілді.
– Теміржолдың қауіпті аймақ екендігіне қарамастан теміржол бойындағы тәртіп бұзушылық тыйылмай тұр. Жыл басынан бері 900-ге жуық әкімшілік хаттама толтырылып, 380-нен астам әкімшілік шара алынды. Жазатайым оқиғаның құрбаны болмау үшін әр адам теміржол көлігіндегі қауіпсіздік ережелерін білуі және сақтауы тиіс, – деді Қызылорда станциясындағы ЖІІб ӘПБ бастығы Бағдат Маханов.
«Көліктегі қауіпсіздік» республикалық акциясы кезінде ғана емес, жалпы теміржолда қауіпсіздік мәселесі өзектілігін ешқашан жойған емес.
– Қауіптілігі жоғары аймақта орын алатын қайғылы жағдайлардың негізгі себептері азаматтардың жеке қауіпсіздік ережелерін сақтамауынан, теміржолдың рұқсат етілмеген жерлерінен өтуінен болады. Бұл мәселе теміржолдың партиялық филиалының да үнемі назарында тұр, – деді «Аманат» партиясы Теміржол филиалының атқарушы хатшысы Базара Танбаева.
