Бағбан теміржолшылар жайлы не білеміз?
Ақтөбе облысы бойынша меншікті тілші
«ҚТЖ» ҰК» АҚ – «Ақтөбе қорғаныс екпе ағаштар дистанциясы» филиалының атқаратын миссиясы ерекше. Темір жол бойын қыста қар, жазда құм басудан қорғап, жол жағасына тал-дарақ өсіретін, оны күтіп баптаумен жолшылар секілді уақытының көбін далада өткізетін осы бір бағбан теміржолшылар еңбегін қалай дәріптестек те жарасады.
Екпе ағаштар дистанциясы аты айтып тұрғандай, теміржол бойын түрлі табиғат құбылыстарынан қорғайтын ағаштар өсіріп, пойыздардың қозғалыс қауіпсіздігіне айтарлықтай үлес қосады. Сонымен қатар, жыл сайын Атырау жол дистанциясы басшылығымен бірлесе отырып, темір жол бойындағы құм басатын жерлерді анықтау жұмыстарын жүргізеді. Сосын анықталған жерлерді шақырымдарға бөліп, құмға қарсы қондырылатын механикалық қамыс құрылғыларын орнатады.
Ақтөбе қорғаныс екпе ағаштар дистанциясына қарасты Исатай өндірістік телімін 40 жылдан астам уақыт басқарып келе жатқан Бергенәлі Жақашев құм басу қаупі бар аумақтарды анықтап, алдын алу жұмыстарын сәтті ұйымдастырып келеді. Биыл да күн жылына маусымдық жұмыстар басталып, бригадалық топ анықтау жұмыстарын жүргізгеннен кейін құмды бөгеу, қамыс өру жұмыстарына кіріскен. Дистанция қызметкерлері қазір Атырау жол дистанциясы мекемесіне қарасты темір жол бойына құмға қарсы қондырылатын механикалық қамыс құрылғыларын орнатумен айналысуда.
«Үнемі аңызақ далада жүреміз. Қар мен құм басу секілді табиғи құбылыстарды бөгеп, екпелер отырғызамыз. Ең бастысы – пойыздардың қауіпсіздігін сақтау. Ол үшін өзімізге тиесілі өндірістік аймақтарда жүк және жолаушы пойыздарының қауіпсіз қозғалысын қамтамасыз ету – барлық теміржол қызметкерелерімен бірдей біздің де міндетіміз», – деді Бергенәлі Қадырұлы.
Б. Жақашев өз мамандығын жете меңгерген, әріптестер арасында ерекше беделге ие жан. Іскерлігі мен ұйымдастырушылық қабілеті жоғары тәжірибелі тәлімгердің шәкірттерінің өзі бір төбе. «Теміржол бағбандары» атанған ұжым жуырда алпыс жасқа толған әріптестері һәм ұстаздары Бергенәлі Жақашевті мерейтойымен құттықтап, мықты денсаулық, шаңырағына шаттық тіледі.