Қауіпсіздік айлығы: Астана вагон пайдалану депосында төрт айда 36524 пойыз қаралды
«Қазақстан теміржолшысы» газетінің тілшісі
«ҚТЖ-Жүк тасымалы» ЖШС бойынша барлық вагон пайдалану деполарында былтырғы 15 қараша мен биылғы 15 наурыз аралығында «Бүйір рамасын бақылау» төрт айлығы өтті. Іс-шараның қорытындысы сәуірде шығарылып, бүйір рамасынан ақау тапқан теміржолшылар арнайы марапаттарға ұсынылды.
Төрт айлық аясында еліміздегі барлық вагон деполарындағы техникалық қызмет көрсету және бақылау қосындарының ауысымдарында вагон арбасының ақауларын анықтау бойынша техникалық сабақтар өткізілді. Пойыздарға техникалық қызмет көрсету және вагондарға жүк тиеу, түсіру барысында бүйір рамаларының букстық ойықтарына, дәнекерленген бөлшектердің жағдайына ерекше назар аударылып, олардан кемшілік анықталған жағдайда ВУ-23 формасы толтырылып, вагондар ағымдағы жөндеуге ағытылды. Барлық атқарылған жұмыстар туралы есептер он күн сайын өндірістік бөлімге тапсырылып отырды.
Қауіпсіздік айлығына атсалысқан Астана вагон пайдалану депосында төрт айда 36524 пойыз қаралып, оның ішінде 41 жүк вагоны ақау табылуына байланысты ағымдағы жөндеуге ағытылған. Бұл вагондардың алтауы – Қазақстанның, қалғандары – ТМД аумағынан келген вагондар. Депоның бірінші санаттағы инженер технологы Абылай Қысқаштың айтуынша, айлық аяқталған соң қорытындысы шығарылып, вагон қараушыларды ынталандыру мақсатында ақау тапқан жұмысшылар ақшалай сыйақыға ұсынылып, аса күрделі де қауіпті ақауды анықтаған вагоншылар «Қозғалыс қауіпсіздігі үшін» төс белгісіне ұсынылуда. Мұндай іс-шаралар ҚТЖ бойынша барлық вагон пайдалану деполарында өткізіліп, тиісті нәтижелер шығарылуда. Марапат алған үздік вагон қараушылар тамыз айында өтетін Теміржолшылардың төл мерекесінде ұлықталатын болады.