Кәсіби қырағылық: вагон қараушы пойыз қозғалысын қауіптен қорғады

Қызылорда өңіріндегі Қазалы вагон пайдалану депосының вагон қараушы-жөндеушісі Құрманбек Асқаров кәсіби шеберлігінің арқасында ақаулы вагонды уақытылы анықтап, жүк пойызының қозғалыс қауіпсіздігін қамтамасыз етті.

2025 жылдың 7 шілдесінде Қазалы бағытынан келе жатқан №20 634 жүк пойызы Қызылорда станциясындағы Қазалы вагон пайдалану депосына қарасты техникалық қызмет көрсету пунктіне (ПТО) жоспарлы тексеруден өту үшін келіп тоқтаған болатын. Осы кезде вагон қараушы-жөндеуші Құрманбек Жақсыбайұлы да жүктелген кәсіби міндетін атқаруға дереу кірісті. Ол бұл процесті барлық регламентке сай, визуалды және акустикалық бақылау әдістерін, өлшеу құралдарын пайдалана отырып жүзеге асырды. Оның вагон қарау кезінде қолданған негізгі әдістері: дөңгелек жұптардың көлденең және бойлық саңылауларын тексеру, буксалық тораптардағы май ағып кетуін бақылау, тежегіш құрылғылардың, серіппе аспалары мен амортизациялық элементтердің техникалық жай-күйін бағалау, сондай-ақ бұрандалық және қосалқы бекіткіштердің тартылуын тексеру болды.  

Ақаулы вагонды кәнігі вагоншы көзден қалт жібермей бірден анықтайды. Бұл жолы да солай болды. Пойыз вагондарын қызметтік тексеру барысында Құрманбек жүк вагонының оң жақ дөңгелек жұбында торцтық М110 гайкасының босап кеткенін және оның себепшісі болып М12 бекітпе болттың үзіліп, стопорлық планканың орнының өзгеріп қалғанын анықтады. Бұл ақау вагонның жүріс бөлігінің қалыпты жағдайына айтарлықтай қатер төндіретін еді. Табылған ақау жайлы Құрманбек Асқаров дереу ауысым басшысы Бауыржан Күнгібаев пен вагон шебері Мейрамбек Байсағұловқа хабар беріп, қозғалыс қауіпсіздігіне төнген қауіптің алдын алды. Өз кезегінде, ВЧД-6 оператор-менеджері Дана Молдашева форма ГУ-24 негізінде ақаулы вагонды ТОР тәртібімен құрамнан шығару және маневрлік аумаққа алып кету туралы пәрмен берді.  

– Бұл – Құрманбектің анықтап отырған төртінші күрделі ақауы. Ол өзінің кәсіби міндетін орындап қана қоймай, техникалық қырағылығы мен салаға деген адалдығын ісімен дәлелдеп отыр. Қарапайым визуалды бақылаудан бөлек, ол акустикалық әдісті де тиімді пайдаланып, вагонның жүріс бөлігіне тән емес дыбыстарға ерекше мән беріп, болт пен гайка байланысының бұзылғанын уақытылы аңғарды, – дейді вагон шебері Мейрамбек Байсағұлов.  

Жиырма жыл тәжірибесі бар Құрманбектен күрделі ақауларды уақытылы анықтай білудің сыры неде деген сұраққа:  

«Вагон қараушы-жөндеушінің кәсіби дайындығы жан-жақты болу керек деп білемін. Оның ішінде теміржол вагондарының техникалық құрылымын жетік білуі, яғни бұрандалы қосылыстардың тартылу үдерісін тексеру, дөңгелек жұп пен букса тораптарының майлау жүйесін бақылау сияқты тағысын тағы дүниелерді білуі шарт. Ол үшін техникалық сабақтарға үнемі қатысып отыру керек. Бұл сабақтардың берері көп. Кейде адам білетін нәрсесін ұмытып қалып жатады. Сондықтан үнемі білім көкжиегін жетілдіріп, біліктілігін арттырып отырғаны абзал, – дейді вагон қараушы Құрманбек Жақсыбайұлы.