Жіңішке станциясында қауіпсіздік айлығы өтті
Ақтөбе облысы бойынша меншікті тілші
Теміржол – қауіптілігі жоғары аймақ. Жыл басынан бері ел аумағындағы станцияларда 45 оқиға тіркеліп, жолды кесіп өтпек болған 26 адам қаза тапты, 21 адам түрлі жарақат алды. Олардың арасында балалар да бар...
Осыған байланысты 1–30 қыркүйек аралығында «Шара қолдан – өміріңді сақта» атты қауіпсіздік айлығы өткізілді. Айлықтың басты мақсаты – адамдардың, әсіресе балалардың теміржол бойына шығып, өмірлеріне қауіп төндірудің алдын алу.
Жіңішке станциясының инженер-технологі Гүлжазира Жүсіпованың айтуынша, айлық барысында мектептерде түсіндіру сабақтары өтіп, бейнероликтер көрсетілген. Теміржолшылар мен полиция қызметкерлері бірлесіп рейд жүргізіп, жаяу жүргіншілер өткелдері мен қоршаулар тексеріліп, қауіпсіздік белгілерін жаңарту шаралары қолға алынған.
Мамандардың айтуынша, теміржолдағы жазатайым оқиғалардың негізгі себебі – қауіпсіздік ережелерін білмеу және немқұрайлық. Жаяу жүргіншілер көпірлерін пайдаланбау, құлаққаппен жүру, ішімдік ішкендердің жолдан өту т.т. факторлар адам өміріне үлкен қауіп төндіреді.
Өкінішке қарай, мұндай салғырттық кейде орны толмас қайғыға әкеліп жатады. Мәселен, өткен жылдың тамыз айында Ақтөбе станциясында жас әйел баласымен бірге пойыз астына түсіп, екеуі де көз жұмды.
Теміржолшылар тұрғындарды жеке қауіпсіздік ережелерін қатаң сақтауға шақырады. Балаларға теміржолдың қауіпті екенін түсіндіріп, оларды қараусыз қалдырмау – ата-аналардың басты міндеті.