Маңғыстау теміржолында қауіпсіздік шаралары күшейтілді
Маңғыстау облысы бойынша меншікті тілші
Өткен айда жарияланған «Шара қолдан – өміріңді сақта» айлығы аясында Маңғыстау теміржолында бірқатар іс-шаралар жүзеге асырылды.
Бас қауіпсіздік ревизоры М.Шакеновтің жеделхаты бойынша атқарылған жұмыстардың мақсаты, аты айтып тұрғандай, адам өмірін сақтауға арналды. Аталған айлықты негізге ала отырып Маңғыстау жол дистанциясы арнайы жоспарын жасақтап, Бейнеу, Маңғыстау, Мұнайлы, Қарақия аудандарының әкімдіктері, Маңғыстау станциясындағы желілік полиция бөлімімен бірлесіп тұрғындар және мектеп оқушыларымен кездесулер ұйымдастырды.
– Өкінішке орай, бүгінде статистика бойынша түрлі себеппен пойыздың астына түсіп ажал құшқандар саны адам шошырлық. Осы жылдың басынан бері 47 адамды пойыз басу оқиғасы тіркеліпті. Оның ішінде 26-сы қаза тауып, 21-і түрлі деңгейде жарақат алған. Айдың күні аманында осынша жанның қарапайым қағидаларды ескермей немесе басқа да себептермен темір жолға шығып, қаза тапқаны жанымызды ауыртады. Сондықтан халықпен кездесулерде осыны түсіндіріп, жолда жүрудің ережелерін ескертіп, асыл өміріңді аяла, адамдар, өмір бір-ақ рет беріледі дегің келеді, – дейді Маңғыстау жол дистанциясының жетекші жол инженері Ержан Артықбаев.
Жол дистанциясының қызметкерлері жоғарыда аталған әкімдік және желілік полиция қызметкерлерімен бірлесіп бірнеше ауылды аралап, тұрғындармен кездескен. Болашақ ауылындағы №10 орта мектепте, тағы бірқатар мекемелерде бейнероликтер мен суреттерді және көрнекілік құралдарын қолдана отырып, тақырып туралы тереңінен мағлұмат берген. Мұндай жиындар Болашақтан соң Жаңаөзен қаласының Теңге ауылы лицейінде, Қарақия станциясы мектебінде, Маңғыстау станциясындағы орта білім беру мекемелерінде, Боздақтағы бастауыш мектепте өткен.
Дистанция өкілдерінің айтуынша, жалпы бұл бағытта телім басшылары ай сайын оқушыларға түрлі профилактикалық кездесулер ұйымдастырып тұратын көрінеді. Сондай-ақ теміржол аумағында «Қызмет жолы», «Сақ болыңыз», «Темір жолдан белгіленген арнайы өткел жолдан өтіңіз», «Пойыздан сақтан!» «Ата-аналар, қауіпті аймақта баланы қараусыз қалдырмаңыз!» деген баннер-тақтайшалар ілулі тұр.