Шымкентте «Темір жол – қауіпті аймақ» акциясы өтуде
Түркістан облысы бойынша меншікті тілші
«Әскерилендірілген теміржол күзеті» ЖШС Шымкент станциясы атқыштар командасы «Темір жол – қауіпті аймақ» тақырыбы аясында профилактикалық іс-шаралар легін ұйымдастыруда.
Теміржол инфрақұрылымындағы тасымалдау процесінің қауіпсіздігін және тасымалдағы жүктердің сақталуын күшейтуге бағытталған айлық қазанның 14-нен қарашаның 14-не дейін жалғасады. Жуырда Шымкент станциясы атқыштар командасы бастығының орынбасары Ербол Жұмалиев Шымкент белгі беру және байланыс дистанциясында кездесу ұйымдастырды. Басқосуға Шымкент көлік полициясы басқармасының полиция майоры Шарипа Сыздықова да қатысып, теміржол аймақтарындағы құқықтық тәртіп пен қауіпсіздік талаптарын сақтау мәселелеріне тоқталды.
Іс-шара барысында қатысушыларға «Темір жол – қауіпті аймақ», «Теміржол өткелдерінен өту ережелері», «Көліктегі қауіпсіздік» тақырыптарында түсіндіру жұмыстары жүргізілді. Сонымен қатар теміржол бойында мал жаюға тыйым салу, қозғалыс қауіпсіздігін сақтау және пойыз қозғалысына кедергі келтіретін жағдайлардың алдын алу қажеттігі еске салынды.
Ербол Жұмалиев өз сөзінде жазатайым оқиғалардың алдын алу, пойыздардың шұғыл тежелуін болдырмау және жануарлардан темір жолды қорғау мақсатында қоршау орнату жұмыстарын жүйелі түрде жүргізудің маңызын атап өтті. Сондай-ақ бұл бағыттағы іс-шараларда жергілікті тұрғындармен тығыз байланыста болудың тиімділігіне назар аударды.
Бұдан бөлек, кездесу барысында азаматтар арасында қару-жарақ пен оқ-дәрілердің, жарылғыш және суық қарулардың заңсыз айналымына жол бермеу жөнінде түсіндірме жұмыстары жүргізілді.
Теміржолшылар мен құқық қорғау органдарының өкілдері атап өткендей, темір жолдағы қауіпсіздік – баршаға ортақ жауапкершілік.