Мақсат – қауіпсіздік мәдениетін арттыру

Шымкентте «ҚТЖ» ҰК» АҚ-ның VII өндірістік қауіпсіздік форумы өтті. «Еңбекті қорғауды бизнес-процестерге интеграциялау» тақырыбында ұйымдастырылған іс-шараға «Самұрық-Қазына» қорының портфельдік компаниялары мен серіктес ұйымдары, Samruk Business Academy мен Компанияның әр деңгейдегі қызметкерлері және өңірдегі теміржол мекемелерінің қызметкерлері қатысты.

Форумда еңбек қауіпсіздігін басқару тетіктерін жетілдіру, тәуекелді бақылау, корпоративтік стандарттарды енгізу мәселелері қызу талқыланды. Атап айтқанда, DB Engineering & Consul компаниясының кеңесшісі Еркін Жусанбаев «Заманауи қауіпсіздікті басқару жүйелері» (SMS)» тақырыбында баяндама жасаса, Еңбекті қорғау жөніндегі республикалық ғылыми-зерттеу институтына қарасты Кәсіптік тәуекелдерді бағалау орталығының жетекшісі Жанат Есбенбетова «Еңбекті қорғау саласындағы кәсіптік тәуекелдерді басқару жүйесін жетілдіру» жайында сөз қозғады. Сол сияқты Шымкент қаласы Еңбек департаментінің мемлекеттік инспекторы Серік Алиманов жұмыскерлердің еңбек құқықтарын қорғау бойынша атқарылған жұмыстары жөнінде арнайы баяндама жасады.  

Ал салаға жетекшілік ететін Ұлттық компания тарапынан цифрландыру дәуірінде адами әлеуетті басқару бағытындағы қауіпсіздіктің жаңа үлгілері жөнінде ҚТЖ-ның Адами ресурстарды басқару департаментінің HR-серіктесі Алма Сәулебаева мен «Магистральдық желіні басқаруда еңбекті қорғауды интеграциялау: стратегиядан тәжірибеге» тақырыбында Магистральдық желі дирекциясының бас инженері Қайырбай Орынбаевтың баяндамасы қатысушылардың ерекше қызығушылығын тудырды.  

Жалпы, күн тәртібінде бекітілген панельдік сессияларда өндірістік қауіпсіздік мәдениетін арттыру жолдары сараланды. Сонымен бірге басқосуда ұзақ уақыт бойы жарақаттанусыз жұмыс істеп, жоғары кәсібилік деңгейін көрсеткен кәсіпорын жетекшілері мен қызметкерлері марапатталды және оларға сенім сертификаттары тапсырылды. Сондай-ақ шара аясында нөлдік жарақаттану деңгейін 30 жылдан бері сақтап келе жатқан ұйымдардың тәжірибесі таныстырылып, үлгі ретінде осы тақырыптағы бейнероликтер көпшілік назарына ұсынылды.  

Тағы бір айта кетерлік жайт, форум қорытындысында еңбек қауіпсіздігін компанияның барлық бизнес-процестеріне кешенді енгізу бойынша нақты ұсыныстар да әзірленді. Ұйымдастырушылардың айтуынша, ендігі жерде форумда айтылған қауіпсіздік талаптары өндірістік жоспарлау мен басқарушылық шешімдердің ажырамас бөлігіне айналуы тиіс.