«Даңқ» ескерткішіне тағзым
"Қазақстан теміржолшысы" газетінің Жамбыл облысындағы меншікті тілшісі
Жамбыл локомотив пайдалану депосында 1941-1945 жылдардағы Ұлы Отан соғысының елге әкелген қайғы-қасіретін ұмыттырмай «Даңқ» ескерткіш-белгісі тұғырда тұр. Екі қанатына мәрмәр тасқа бүгінгі бейбіт күннің өтеуі үшін жан қиған теміржолшылардың есімі қашалып жазылған.
Ал ескерткіш тастың ортасындағы «Бәрі түгел есімдерімен есте, аза тұтып еске аламыз! Бұл тірілерге керек!» деген сөзді оқып, еріксіз ойға шомасыз...
Ескерткіш тура шойын жолдың бойына қойылған. Локомотив тізгіндеген машинистер мен көмекшілері күн сайын кешегі қан майданда отан үшін жан қиған ерлердің рухына іштей тағзым етіп өтеді.
Дерекке сүйенсек, соғысқа сол кездегі Жамбыл локомотив депосынан 200-ден астам теміржолшы-машинист майданға аттанған екен. Солардың тең жартысынан астамы елге оралған жоқ. Аман келгендері өздерінің жауынгерлік гимнастеркаларын ауыстырып, қайтадан паровоз тізгініне отырып, ұзақ жылдар еңбек майданында еселі еңбек етті. Олардың әрбірі туралы дерек депоның мұражайында қаттаулы тұр.
Қан майданда опат болған ерлердің құрметіне Жамбыл локомотив пайдалану депосында 1981 жылы 6 мамырда «Даңқ» ескерткіші ашылды. Жыл сайын жеңіс күні ескерткіш гүл дестелеріне толып, соғыс құрбандарының ұрпақтары, бүгінгі әріптестері «Даңқ» ескерткішіне тағзым етіп, олардың рухына бас иеді.
