Майдан даласының қарлығашы
Қызылорда облысы бойынша меншікті тілші
Қызылорда жол дистанциясының ұжымы соғыс ардагері Любовь Сергеевна Колесникті Ұлы Отан соғысы жеңісінің 75 жылдық мерейтойымен құттықтады.
Қызы Татьянаның қамқорлығындағы ардагер биыл 95 жаста. Қимыл қозғалысы ауырлағанмен, өзін сергек сезініп, жолшылар ұжымы атынан келген Ғалия Ноғайбаева мен Рақымжан Сардарбековты қуана қарсы алып, «Бұлар менің коллективім – теміржолшылар» деді мақтанышпен.
Теміржолшылардың ыстық ықыласы толтырылған азық-түлік себеті мен кәсіподақ ұйымы атынан қаржылай көмекті қабыл алған Любовь Сергеевна өзін Жеңіс күнімен құттықтаған барша әріптестеріне алғысын білдірді.
Қызылорда медициналық техникумын тәмамдап, кәмелет жасына жеткенде Отан қорғауға соғысына аттанған Любовь Колесник маршал Г. Жуков басқаратын І-Белоруссия майданында медбике болыпты. Жаңбырдай жауып тұрған оқ пен оттың арасында жүгіріп жүріп жаралыларға көмек көрсететін медбикелерді барлық солдаттар жақсы көріп, «майдан даласының қарлығаштары» деп еркелетеді екен.
Сұрапыл соғыстың соңына дейін жетіп, Берлиннің танымал Бранденбург қақпасына «Енді әлемде бейбітшілік болсын» деген жазу қалдырған медбике қыз туған жеріне 1945 жылдың қыркүйегінде жеңіспен оралады. Содан Қызылорда теміржолының медпунктіне фельдшер болып орналасып, зейнет жасына жеткенше табан аудармай еңбек еткен ардагердің ендігі тілегі - әлемде тыныштықтың бұзылмауы, балалардың шаттық күлкісінің тарқамауы.
– Дистанция есебіне тіркелген соғыс ардагерінен тек осы кісі қалды. Сондықтан жалғыз ардагерімізді тек жеңіс күні құттықтамай, жиі хабар алып, қал жағдайын біліп тұрамыз, – деді дистанциясының кәсіподақ ұйымының төрайымы Ғалия Ноғайбаева.