Тораптық станция диспетчері
«Қазақстан теміржолшысы» газетінің тілшісі
Еліміздегі ірі тораптық станция Павлодарда жиырма жыл станциялық диспетчер болып жұмыс істейтін Эрик Сүлейменовті әріптестері өте талапшыл, сауатты, білікті ұйымдастырушы деп біледі. Кейіпкеріміздің жалпы темір жол саласындағы еңбек өтілі 30 жылдан асып жығылады.
Эрик Кәрімұлы Павлодардағы кәсіптік білім беретін оқу орнын бітіріп, теміржол саласындағы еңбек жолын Тың темір жолына қарасты Павлодар-Оңтүстік станциясында пойыз құрастырушының көмекшісі болып бастаған. Екі жылдан соң пойыз құрастырушы болды. Бұдан кейінгі жылдары тәжірибе жинақтап, электрлік орталықтандыру қосынының кезекшісі, станция кезекшісі жұмыстарын атқарды. 2002 жылдың 1 наурызынан бастап станциялық диспетчер қызметіне тағайындалып, күні бүгінге дейін еңбек етіп келеді. Станциялық диспетчер ретінде тәжірибесі мол маман жоғары ұйымдастырушылық қабілетінің арқасында күрделі өндірістік жағдайларда оңтайлы шешім тауып, білімі мен біліктілігін көрсетіп келеді. Павлодар станциясының жұмысын тиімді ұйымдастыру оңай жұмыс емес. Ауысым бастығы ретінде пойыздардың қозғалыс қауіпсіздігін қамтамасыз етуге айрықша көңіл бөліп, еңбек қорғау және қауіпсіздік техникасы талаптарының сақталуын, еңбек және өндірістік тәртіпті нығайту, кадрларды тәрбиелеу мәселелерін назардан тыс қалдырған емес. Әріптестері Эрик Сүлейменов станциялық диспетчер ретінде жиырма жылдық тәжірибесі бар майталман маман бола тұра, жұмысына кіріскенде лауазымдық міндеттерін үлкен жауапкершілікпен адал атқаратынын айтады.