Қызылордалық жолшылар Семейге көмекке барды
Қызылорда облысы бойынша меншікті тілші
Сыр бойының темір жолын бабында ұстап, кәсіби шеберліктерімен танылған қызылордалық жолшылар биыл шығыстағы әріптестеріне көмек көрсетті.
Көмекке қызылордалық жол жөндеушілердің таңдалуы өңір теміржолшыларына деген сенімнің жоғары екенін танытса керек. Қыркүйек айының алғашқы күндері Қызылорда магистральдық желі бөлімшесі басшылығының ұйғарымымен аймақтағы Қызылорда, Қазалы және Сексеуіл жол дистанцияларының бір топ жолшылары Семей магистральдық желі бөлімшесіне қарасты Күмістау станциясындағы әріптестеріне практикалық көмекке жіберілді.
Күмістау станциясы орналасқан жер рельефі күрделі, ал теміржол төсемдері көп уақыттан бері жөндеу көрмегендіктен тозығы жеткен. Қызылордалық жолшылар дистанция телімдерінің 75, 80-81, 85-86, 92, 102-105 шақырымдарындағы жарамсыз ағаш шпалдарды ауыстыру, қисық жолдағы р-50 типті рельстерді р-65 типімен алмастыру, шойшегелерді толықтырып қағу, ескі темірбетон шпалмен салынған 80-82 және 76-77 шақырымдағы рельстер арасының тарылуын, жолдың ойқыш тартып ығысуын ретке келтіріп, түйіспе саңылауларды технологиялық талапқа сай бабына келтірілді. Қызылорда магистральдық желі бөлімшесі жол бөлімінің басшысы Сағатбек Тумырзаев тапсырылған жұмыстардың жоғары деңгейде орындалғанын жеткізді.
– Семей өңіріндегі өндірістік қажеттілікке орай және жол жөндеушілер штатының толық жасақталмауына байланысты Қызылорда, Қазалы және Сексеуіл жол дистанцияларының бір топ жолшылары Күмістау станциясындағы ПЧ-38 жол дистанциясына практикалық көмек беру жайында ЦЖС Рахметовтің пәрменіне сай әрекет еттік. Біздің теміржолшылар Күмістау станциясында қыркүйек пен қазан айларында болып, жол табанын сауықтыруға байланысты жоспарлы жұмыстарды жүргізді. Әрине, әріптестік көмекке жол дистанцияларындағы тәжірибелі жол жөндеушілерін таңдап жібердік. Қызылорда жол дистанциясынан Нұрболат Сақтағанов, Сексеуіл жол дистанциясынан Нұрлыбек Қарабасов және Қазалы жол дистанциясынан Ерболат Боданов бастап барды. Олар тапсырылған жұмыстарды жоғары деңгейде сапалы атқарғанын сол жақтағы әріптестеріміз де растады, – деді С.Тумырзаев.
Расында Күмістау жол дистанциясының бастығы Р.Аралбаев бастаған жергілікті дистанция басшылары сырбойылық әріптестерінің практикалық тұрғыдан жасаған жұмыстарын бақылаудан өткізіп, сапасы көңілден шығып, алғыс білдіріпті.
Бұл – жол жөндеушілердің алғашқы легі. Енді екінші кезекте қызылордалық жолшылар 8 мың дана шпал төсеуге көмекке бармақ.