Семейлік жолшылар жазғы жол жөндеу жұмыстарына дайындалып жатыр
Абай облысы бойынша меншікті тілші
Семейлік жолшылар қауымы биылғы қыс маусымын ойдағыдай аяқтап, алғашқы тоқсанда жазғы жол жөндеу жұмыстарына даярлық шараларын толық пысықтап шықты. Енді 17 сәуір мен 5 мамыр аралығында өтетін көктемгі комиссиялық бақылау шараларын өткізген соң желі бойында қауырт жұмысқа кіріспек.
Семей – Локоть, Жаңа-Семей – Дегелең бағытына қызмет көрсететін Семей жол дистанциясы жазғы жұмыстарға әзірлік барысын толық аяқтады. Жыл басынан бері жоспарлы шаралар қатары әзірленіп, 8 мәрте өткізілген техникалық дәрістерде де жолшылар қауымына жазғы жұмыстар легі кеңінен таныстырылды.
Сонымен қатар, осы аралықта еңбекті қорғау мәселелері бойынша жалпы саны 328 адам аттестаттаудан сәтті өтіпті.
– Әрине, жол жұмыстары нәтижелі болуы үшін оған даярлық шаралары толыққанды жүргізілуі керек. Бұл орайда әуелгі кезекте желі бойындағы барлық жолшылардың тұрмыстық қажеттіліктерін жүз пайыз көлемінде толық жабдықтадық. Сонымен қатар Дегелең және Шаған станцияларында жолшылардың қажеттіліктері үшін жаңадан екі модуль орнатылды, – дейді дистанция бастығы, Құрметті теміржолшы Рахат Ботаспаев.
Алғашқы тоқсанда дистанция басшылығынан құрылған комиссия 28 мәрте тексеру жұмыстарын жүргізіп, бірқатар олқылықтарды анықтаған. Соның нәтижесінде берілген 36 ескерту межелі мерзім ішінде қалпына келтіріліпті.
Дистанцияның еңбекті қорғау бойынша жетекші инженері Гүлзавира Елемесованың айтуынша, жыл басынан бері өндірістік жарақаттануға жол берілмеген. Залалды еңбек жағдайында жұмыс істейтін 50 адамға тиісті жағдай жасалған.
Жалпы, дистанция бойынша еңбек ететін төрт жүзге таяу жолшылар үшін қолайлы еңбек ортасы қалыптастырылды деуге толығымен негіз бар. Жолшылар жағдайы жақсы болса, жұмыс барысы да өнімді болатынын ескерген басшылық аянып қалмаған. Бұл әлбетте жазғы жол жұмыстарын ойдағыдай еңсеруге мүмкіндік берері анық.
Қазіргі таңда дистанция бойынша қажетті материалдар көлемі анықталып, арнайы тапсырыс әзірленуде. Жоспарлы шаралар ішінде әсіресе Дүйсекен және Белағаш станциялары аралығында жүргізілетін күрделі жөндеуге басымдық берілмек. Жолшылар үшін жолдың балдық сапасын жақсартып, заманауи тұрғыда, яғни темірбетонды түйіспесіз жолдарға ауыстырып шығу басты мақсат болып отыр. Оның тағы бір себебі, елімізді, Орта Азияны және Қытайды Ресеймен жалғайтын «солтүстік тармақта» жүк пойыздарының қозғалыс барысы айтарлықтай жиілеген. Яғни ПЧ-39 мекемесінің жолшыларына артылар жауапкершілік те үлкен деген сөз.