Еңбекті қорғау күні Абай облысында кең көлемде аталып өтті
Абай облысы бойынша меншікті тілші
Халықаралық еңбекті қорғау күні Абай облысындағы теміржолшылар арасында да кең көлемде аталып өтті. Аталған игілікті шараны бұл жолы да жергілікті салалық кәсіподақ ұйымы ұйымдастырды.
Осынау күні барша кәсіподақ белсенділері, еңбекті қорғау инженерлері бөлімшенің кең ауласына жиналды. Әуелгі кезекте олар өндіріс барысында жазатайым қаза болған әріптестерін бір минут үнсіздікпен еске алды. Осыдан соң бөлімшенің кәсіподақ ұйымының төрағасы, Құрметті теміржолшы Алик Досанов сөз алып, теміржол қызметіндегі еңбекті қорғау іс-шараларының маңыздылығы жайында келелі баяндама жасап, атаулы күнге орай жылы лебіз білдірді.
Сонымен қатар, мекемеде қауіпсіз еңбек жағдайларын қамтамасыз етіп, қауіпсіздік талаптарын қатаң сақтап, еңбекті қорғау мәдениетін қалыптастыруға қосқан зор үлесі үшін бірқатар теміржолшылар Құрмет грамотасымен марапатталды. Мұнымен қоса, еңбекті қорғау күніне орай ұйымдастырылған «Әке, анашым, мен сізді үйде аман-сау күтемін!» атты тақырыптағы балалардың сурет байқауының жүлдегерлері марапатталып, кәсіподақ тарапынан арнайы сыйлықтар алды.
Ал, осыдан соң жиналған теміржолшылар қауымы «Локомотив» спорт клубының нұсқаушысы Наталья Мешкованың жетекшілігімен еңбекті қорғау күніне орай арнайы флэшмоб өткізіп, әріптестерін салауатты өмір салтын ұстануға үндеді.
Аталған шара барысында өндіріс барысындағы қауіпсіздік жөніндегі пайдалы әдебиеттерден әзірленген «Еңбекті қорғау» бұрышы да көпшілік назарына ұсынылды. Бөлімшенің ғылыми-техникалық ақпарат және талдау орталығының бастығы Баршагүл Омарова әсіресе жас буын теміржолшыларды соңғы жаңалықтармен кең көлемде ақпараттандырды. Қазіргі таңда бөлімше бойынша ЭЧ-18, ВЧД-23 сынды көптеген мекемелерде Халықаралық еңбекті қорғау күніне орай танымдық-тағылымдық мәні зор іс-шаралар ұйымдастырылып өткізілуде.
