Әйтеке би станциясында ағаш шпалдар ауыстырылуда
Ақтөбе облысы бойынша меншікті тілші
Әйтеке би станциясында жол табанын сауықтыру жұмыстары қызу жүруде. Құдықсай – Әйтеке би аралығындағы 35 шақырымдық жолда ағаш шпалдар темір-бетонға ауыстырылуда. Ширек ғасыр қызмет еткен ескі рельстер де жаңартылып жатыр.
Жол жөндеу жұмыстарын міндетіне алған «Теміржол жөндеу» ЖШС мекемесінің Ақтөбе ПМС филиалы жол табанын жаңарту жұмыстарын шілде айында бастады. Жұмыстар желтоқсан айына дейін жалғасады деп отыр.
Ақтөбе филиалының бас инженері Серікбай Беркімбаевтың айтуынша, бүгінде бұл аралықтағы 25 метрлік ескі рельстер алынып, орнына 700 метрлік бунақсыз рельстер төселуде, сондай-ақ ескі ағаш рельстер орнына жаңа темір-бетон шпалдар салынуда. Әрине, жөндеу жұмыстарына Ақтөбе рельс-арқалық зауытының бренд өнімі қолданылады.
Жұмысқа мердігер компанияның жұмысшыларынан бөлек жергілікті жол, белгі беру және байланыс дистанциясының қызметкерлері де жұмылдырылған. Мамандар күрделі жөндеу жұмыстары кезінде байланыс жүйелеріне зақым келмеудің алдын алып, бағдаршам, бұрма жолдардағы қозғалысты реттейтін кабельдерде ақау болдырмауды қадағалауда.
«Ағаш шпалдармен тұрған аралықтар бізде әлі де бар. Негізгі жұмыстар сол ағаш шпалдардың тозуына байланысты жылдамдық азайтып кеткен тұстарда жасалып жатыр. Техникалық талаптарға сай алдағы уақытта бұл жерлерде жылжымалы құрамның жылдамдығы артады», – деді бас инженер.
Қазіргі уақытта Ақтөбе аймағында Жоса – Құдықсай, Әйтеке би – Қызылсай аралықтарында ағаш шпалдар жатыр. Жыл сайын кезең-кезеңмен оларды темір-бетонға ауыстыру жоспарланған.