Семейлік теміржолшылар қолайсыз ауа райында қауырт жұмыс істеп жатыр

Ел шығысы – ауа райының құбылмалығымен ғана емес, геологиялық һәм гидрометерологиялық ахуалдың күрделілігімен де ерекшеленетін аймақ. Семей темір жолы өткен жылдың соңғы тәуліктерінен бастап бүгінгі күнге дейін қолайсыз ауа райы жағдайында қауырт жұмыс жүргізіп келеді.  

Әсіресе Аягөз – Жарма, Өскемен – Риддер телімдері бойынша біршама салмақ түсіп тұр. Бұл ретте НЖС-6 бойынша телімдердегі ахуал біршама күрделі саналады. Дегенмен, барлық теміржол инфрақұрылымдары штаттық режимде жұмыс істеп жатыр. Әйтсе де, бөлімше басшылығы мен шаруашылық ревизорлары баса көңіл аударып отырған бірқатар мәселелер бар. Атап айтсақ, қалың қар басып қалатын телім бойын тұрақты тазарту, электр желілерінің қалыпты жұмысын қамтамасыз ету, әсіресе жолаушы тасымалы бойынша пойыздар іркілісін туғызбау басты міндет болып отыр. Қазіргі күндері бөлімшенің барлық тораптық станциялары бойынша шұғыл тексеру жұмыстары жүргізілуде. Қадағалау, тексеру жұмыстары табиғаты аса қатаң Өскемен өңірінен бастау алып отыр. Басты қадағаланатын нысандар – станция қызметі, бағыттамалы бұрмалардың қауіпсіздігі. Соңғы тәуліктердегі жаңбыр мен қар, оған ілесе келген аяз жағдайды күрделендіріп тұр. Бұл орайда тәулігіне бірнеше мәрте барлық телім бойындағы жолшылардан мағлұматтар жиналуда. Тосын жайт туындар болса, теміржолшылар басшылық келісімімен бірден стандартты емес жағдайда жұмыс істеуге көшеді. Сала мамандары табиғат жағдайына толық бейімделген.  

НЖС-6 диспетчерлігі бойынша барлық жол дистанцияларының жұмыс барысы қатаң қадағалауға алынып отыр. Қар тазалаушы машиналарды желі бойына шығару уақыты, қумажолдардағы қозғалыс барысы барлығы да әр минутына дейін ауа райына байланысты есептелген. Телімдердегі ауа температурасы мен жел жылдамдығы әр үш сағат сайын жазылып алынып, тиісті құжаттарға тіркелуде.  

Қатаң қадағалауға алынған жұмыстардың бірі жергілікті вагон шаруашылығында жүргізілуде. Себебі ауа температурасының күрт төмендеуі жүк вагондары арбасының құйма бөлшектері мен бүйір рамаларының аязға шыдас бермей морт сынуына немесе жарықшақтануына алып келуі мүмкін. Сондықтан қаңтар айы басталысымен бүйір рамасын бақылау күн тәртібіне шығып отыр. Бөлімше бойынша ревизорлық аппаратпен қатар басшылық құрамнан тұратын арнайы комиссия желі бойында рейдке шығып, осы бағытта жұмыс жүргізуде. Бұл шаралар әсіресе желі бойындағы барлық жүк станцияларын толық қамтуда. Бөлімше басшысы Алмас Сейсемқанов тікелей назарда ұстап отыр.    

Соңғы уақытта тәуліктің түнгі мезгілдерінде де жоспардан тыс шұғыл тексерулер өткізіліп, станция қызметкерлерінің жұмыс уақытында өз орындарынан табылып,  штаттық режимде қызмет көрсетуі де бақылануда.    

Енді бірер күнде Семей өңіріне жылдағыдай антициклон – сібірдің сары аязы келеді. Теміржолшылар тілімен айтқанда «қыс шілдесі» басталады...