Ардагерлерге ерекше құрмет көрсетілді

Көлік қызметкерлері күні мен Қазақстан теміржолының 120 жылдығына орай өткізілген салтанатты іс-шараға қатысатын ардагерлерге Қызылорда бөлімшесінің басшылығы ерекше сый- құрмет көрсетті.

Станцияларда тұратын ардагерлер жолаушылар вагонымен Қызылорда қаласына арнайы жеткізілді. Одан әрі қалалық автобус паркінен арнайы бөлінген көлікпен теміржол вокзалынан театрға дейін көлікпен апарылды, оларға арнап қала ішінде және Орталық алаңға экскурсия ұйымдастырылды.  

«ҚТЖ» ҰК» АҚ – «Қызылорда магистральдық желі бөлімшесінің Көлік қызметкерлері күніне арналған мерекелік салтанатты жиыны Асқар Тоқмағамбетов атындағы мәдениет үйінде өткізіліп, үздіктер бөлімше бастығының қолынан марапат алды. Салтанатты іс-шараға облыстық, қалалық әкімдік өкілдері қатысып, құттықтау лебізін білдірді және озаттарға құрмет көрсетті.  

«Құрметті теміржолшы» төсбелгісімен Қазалы жол дистанциясының 4-өндірістік телімінің бастығы Жанділда Ршауов марапатталды. «Адал еңбегі үшін» төсбелгісімен А.Нұржанов, Қ.Қапашов, С. Ибадуллаев, С. Баякеновалар, «Үздік маман» белгісімен Г.Баймукерова, К. Қойшыбаевалар, «Кәсібі бойынша үздік» белгісімен С.Альманов, А. Жұмаділов марапатталды. Аймақта мерекелік іс-шара Қызылорда локомотив пайдалану деполарында да жалғасын тауып, үздіктерге құрмет көрсетілді. Мерекелік жиын «Шаңырақ» мейрамханасындағы концерттік бағдарламаға ұласып, ардагерлер мен сала еңбеккерлеріне әуелеген ән мен күмбірлеген күйден өнер көрсетілді.  

Сыр бойының бас теміржолшысы Батырхан Базарбаев саланың басты марапаты «Құрметті теміржолшы» белгісін 2 теміржолшының төсіне тақты. «Адал еңбегі үшін» медалімен 4 теміржолшы марапатталды. «Құрметті теміржолшы» атанған Талғат Шүренов басқаратын Арал теңізі станциясы жылдың «Үздік станциясы» атанды. Бұдан бөлек аймақ теміржолшылары «Кәсібі бойынша үздік», «Үздік маман», төс белгілерімен марапатталып, ҚТЖ мен Жүк тасымалы басшылығының, Қызылорда облысы мен қала әкімдігінің, бөлімше басшылығы мен кәсіподақ ұйымының Құрмет грамотасы мен Алғыс хатына ие болды.  

Сала ардагерлерінің иығына шапан жабылып, олар ақ тілегін батамен берді. Кәсіби мерекені тиісті деңгейде өткізуге атсалысып, бел ортасында жүрген «Қазкөліккәсіп» ҚБ мен бөлімшеге қарасты мекемелердің кәсіподақ ұйымдарының белсенділеріне алғыс айтылды.

– Бөлімше теміржолшыларының әлеуметтік жағдайының дұрыс болуына алаңдап тұратын әдетімізбен кәсіби мерекені де жоғары деңгейде өткізуге жұмыс істедік. Үздіктердің барлығына лайықты құрмет көрсетуге күш салдық. Сондай марапаттың бірін иеленіп, менің де қуанышым тасып тұр,– дейді бөлімшенің кәсіподақ ұйымының төрағасы, «Адал еңбегі үшін» төсбелгісімен марапатталған Мұхтар Көпірбаев.