Ғасыр жасаған ардагер
Ақтөбе облысы бойынша меншікті тілші
Хромтау қаласында тұратын Ұлы Отан соғысының ардагері, 100 жастағы теміржолшы Василий Грецкийді кешегі әріптестері кәсіби мерекемен құттықтап барды.
Никельтау жол дистанциясының бастығы Қайрат Танабергенов пен кәсіподақ төрағасы Есенбол Оразов қарт теміржолшыға «ҚТЖ» ҰК» АҚ басшылығы мен «Қазкөліккәсіп» ҚБ басшысының атынан тілектерін жеткізіп, қарияны сый-құрметке бөледі. Ардагер ризашылығын білдіріп, алғысы мен құттықтауын жеткізді.
«Теміржолшылар мерекесі, 120 жылдық мерейтой құтты болсын! Бұл нағыз шымыр да шыдамды, жауапкершілігі жоғары азаматтар жұмыс істейтін сала. Қызметтеріңде қолдау көп болсын. Жүк тасымалы артып, табыстарың өссін...», – деді ардагер.
Әкесінен ерте айырылған Василий Грецкий 5 бауырымен бірге аш-құрсақ өскен балалық шағын еске алды. Соғыс басталғанда алдымен үлкен ағасы, 1942 жылы шілдеде өзі майданға шақырылады. Ардагер атты әскер корпусында қызмет етіп, Украина мен Белоруссия, Польша, Чехословакия, Румыния және Германия майдандарында соғысқан. «Қызыл жұлдыз» және II дәрежелі Отан соғысы орденімен марапатталған.
Жеңісті Берлиннен 75 шақырым жерде орналасқан госпитальда қарсы алған Василий Иванович 1946 жылы елге оралып, Шу локомотив депосынан 1984 жылға дейін еңбек етіп, зейнетке шыққан. Бүгінде ардагер 3 баласынан 6 немере, 10 шөбере сүйіп отыр.