Ардагер теміржолшыларға құрмет көрсетілді
Ақтөбе облысы бойынша меншікті тілші
«ҚТЖ-Жүк тасымалы» ЖШС – «Батыс» филиалының директоры Бөріхан Беркімбаев ширек ғасыр ғұмырын теміржол бойында өткізген ардагер теміржолшыларды Қазақстан темір жолының 120 жылдығымен құттықтап, мерейтойлық медаль тақты.
Сала ардагерлерін арнайы қабылдап, айрықша құрмет көрсеткен филиал жетекшісі отандық теміржолдың ғасырлық тарихында қолтаңбасы қалған алдыңғы буынның ерен еңбегіне алғыс айтты.
«Компания президенті қазан айында Ақтөбе бөлімшесіне жұмыс сапарымен келді. Мекемелерді аралап, өндірісті көзімен көрді, танысты. Жүргізіліп жатқан жұмысқа жақсы баға берді. Көрсеткіш жаман емес. 2023 жылмен салыстырсақ, биыл қауіпсіздікке кереғар көрсеткіштер екі есе азайды. Еңбек қауіпсіздігі жоғары деңгейде. Мұның бәрі қызметкерлердің еңбегі, жауапкершілігінің нәтижесі. Ал ардагерлер біз үшін алдымызда тұрған ұстаз, ақыл қосар аға буын. Сіздерді Қазақстан темір жолының 120 жылдығымен құттықтаймынІ Сіздер қандай құрметке де лайықсыздар», – деді Б.Беркімбаев.
Салтанатты шарадан соң дастархан басына шақырылған ардагерлер емен-жарқын әңгіме-дүкен құрды. Қос буынның арасында саладағы жаңалықтар мен өзгерістер айтылып, тәжірибе бөлісіп, әдемі басқасу болды.
– Мен кадр бөлімінен зейнетке шықтым. Еңбек жолымды инженер болып бастадым. 40 жылдан аса еңбек еткен салам маған өте ыстық. Әкем кезінде жол басшыларының қатарында болған атақты теміржолшы болғанын мақтан тұтамын, теміржол саласының әрбір жетістігі мен табысына біз қуанамыз, бүгінгі басқосуды ұйымдастырған басшылыққа алғысымыз шексіз, мерейіміз өсіп бір жасап қалдық, – деді ардагерлер атынан Жанна Ким.