Ардагерлер алғысқа бөленді
Атырау облысы бойынша меншікті тілші
Жуырда Атырау жүк тасымалы бөлімшесінің бастығы Аслан Базарғалиев бір топ ардагарлерді қабылдап, оларға өлке теміржолына сіңірген ерен еңбектері үшін алғыс айтты.
Биыл Қазақ теміржолының 120 жылдығы атап өтілуде. Бөлімше басшысы аға буын өкілдерін осынау айтулы датамен құттықтап, өткен ғасыр басында қазақ даласына темір жол төсеу ісін жалғастырушы ардагерлер еңбегіне ерекше тоқталды.
– Бүгінде домбыраның қос ішегіндей боп ұзыннан-ұзақ шұбатылып жатқан жолдың бәрінде ата-бабамыздың және сіздердің де қолтаңбаларыңыз бар. 120 жылдық тарих белесінде талай қиындықтар еңсерілді. Қазақтың кең сахарасын темір жолмен байланыстыру жұмысы ғасыр бойы жүріп, абыроймен атқарылды. Онда сіздердің қолтаңбаларыңыз сайрап жатыр, сол үшін де сіздерге бүгінгі буын атынан бас иіп, алғысымызды білдіреміз, – деді ол.
– Ардагерлер кеңесінің төрағасы Хамидолла Айтимов, Атырау магистральдық желі бөлімшесі бастығының орынбасары Аманқос Жылқыбаев та осы тілекке қосылып, ардагер ағаларды құттықтап өтті. Барлық еңбек ардагерлеріне мерейтойлық медаль табысталып, кеуделеріне тағылды. Ұзақ жылдар тепловоз жүргізіп, «отарбаның» тізгінін ұстаған, бүгінде жасы тоқсанға таяған Кенже Айтбаев ардагерлер атынан рахметін айтып, ұлттық теміржол саласына даму мен өркендеу тіледі.
