Семейлік теміржолшыларға жаңа автокөліктер пайдалануға берілді
Абай облысы бойынша меншікті тілші
Ұлттық компания теміржолшыларға тамаша сый жасады. Кеше Семейде жергілікті өндіруші «СемАЗ» ЖШС-нен сатып алынған су жаңа автобустар теміржолшылар игілігіне пайдалануға берілді.
Бұл елеулі оқиға ұлттық компанияның жұмысшылардың еңбек жағдайын жақсартумен қатар, отандық бизнесті қолдау және жергілікті өндірісті дамытуға бағытталған маңызды қадамы ретінде бағаланды.
– Өткен жылы ұлттық компания желі бойындағы ғимараттар мен нысандарды күрделі жөндеуден өткізу, жаңалау, талапқа сай ету бойынша қарқынды жұмыс жүргізген еді. Ендігі басымдық әлеуметтік салаға беріліп отыр. Еліміздегі нөмірі бірінші жұмыс беруші компания болғандықтан жайлы жұмыс орнын құрудың маңыздылығы зор, – деп атап өтті салтанатты іс-шараға арнайы келген «ҚТЖ-Жүк тасымалы» ЖШС директорының орынбасары Владимир Бабиченко.
Айта кетерлігі, «ҚТЖ-Жүк тасымалы» ЖШС жергілікті автобус құрастырушы зауытқа тапсырыс беріп, 43 көлік алып отыр. Бұл жолы соның 36-ы қолданысқа берілді. Қалғандары алдағы уақытта жеткізілетін болады. Отандық өндірушілер құрастырған жаңа автобустар еліміздің климатына сай заманауи үлгіде жабдықталған. Барлық сапа стандарттарына лайық. Жаңа көліктер еліміздің барлық ЖТ бөлімшелеріне, жекелеген станцияларға немесе деполарға берілетін болады. Соның ішінде екеуі Семей ЖТ бөлімшесі теміржолшыларының игілігіне пайдаланылмақ.
Салтанатты шара барысында сөз алған Семей ЖТ бөлімшесі ардагерлер кеңесінің төрағасы, Құрметті теміржолшы Қырықбай Әлсейітов теміржолшылар үшін жасалынып жатқан игі істерге ризашылығын білдіріп, «ҚТЖ-Жүк тасымалы» ЖШС басшылығына алғысын білдірді.
«ҚТЖ-Жүк тасымалы» ЖШС – «Семей ЖТ бөлімшесі» филиалының директоры Алмас Сейсемқановтың айтуынша, отандық тауар өндірушілерді қолдау, яғни «СемАЗ» ЖШС-нің пайдасына жасалған таңдау өңірлік бизнесті дамытуға ғана емес, аймақ экономикасын нығайтуға да ықпал етеді.
Зауыттан шыққан су жаңа автокөліктер осылайша қарт Семейден еліміздің әр қиырына жол тартты. Олардың алды Өскеменге жетсе, Маңғыстау түбегіне алдағы апталарда жететін болады.
