Марапат иесін тапты
"Қазақстан теміржолшысы" газетінің Жамбыл облысындағы меншікті тілшісі
Лайықты марапат – адал еңбектің жемісі. «Әскерилендірілген теміржол күзеті» ЖШС Тараз филиалының Тараз станциясындағы атқыштар командасының күзетшісі Серік Игісіновтің Президент Қасым-Жомарт Тоқаевтың Жарлығымен «Ерен еңбегі үшін» медалімен марапатталуы – соның дәлелі.
Күзетшінің мерейін өсірген марапат – саладағы жиырма жылдық табысты жұмысының жемісі. Бұл – қарапайым еңбек адамын тұрақтылыққа жетелейтін күшті ынталандыру. Ал тұрақты жұмыс күші – табыс пен табандылықтың негізі.
Серік Уәлиханұлы үшін күзет саласындағы қызметі тұрақты жұмыс көзі ғана емес, жемісті еңбек жолына айналған.
«Әскерилендірілген теміржол күзеті» Тараз филиалының директоры Еркін Мүсілімов сала мамандарын марапатқа ұсынарда олардың еңбек өтілі, өз міндетін атқарудағы жауапкершілігі, қоғамдық іс-шаралар кезіндегі белсенділігі ескерілетінін атап өтті. Ұжымда жұмысшыларды ынталандыру жөніндегі арнайы комиссия да құрылған. Марапаттау туралы ұсыныс осы комиссия тарапынан түседі.
– Серік Игісінов жұмыс барысында өзін өте жауапты қызметкер ретінде көрсете білді. Атқыштар командасының қызметкерлері арасында беделге ие. Өз ісінің нағыз маманы. Филиал тарапынан ұйымдастырылған қоғамдық іс-шаралардың бәрінде белсенді қатысатын сергек жан. Өз жұмысшыларымыздың күшімен ғимараттың сыртқы қасбетіне жөндеу-әрлеу жұмыстарын жүргізгенде барынша атсалысып қана қоймай, құрылыс жұмыстарын оңтайландыру бойынша ұсыныстар енгізді. Оның ұсынысы расында тиімді болып шықты. Сондықтан, марапат иесін тапты деп айта аламын, – дейді филиал директоры.