Арнайы жасақтың ауқымы кең

Ақтөбе қаласындағы Әскерилендірілген теміржол күзетіне қарасты жедел әрекет ету оңтайлы тобы – стратегиялық маңызы бар нысандардың қауіпсіздігін қамтамасыз ететін сенімді құрылым.

Әскерилендірілген теміржол күзеті филиалының директоры Сарбай Жанғалиұлы аймақ бойынша төрт станцияда орналасқан арнайы жасақ сарбаздарының жұмысына қатысты мәлімет берді.  

Айтуынша, арнайы жасақтың ауқымы кең, Ақтөбе филиалының жедел әрекет ету оңтайлы тобында 43 қызметкер бар. Олар аймақ бойынша Ақтөбеде -10, Қандыағашта -13, Шалқарда - 10 және Оралда -10 қызметкер орналасқан. Күзетшілер ауысым бойынша жұмыс істейді. Күн сайын қызметке кіріспес бұрын, әр қызметкер медициналық тексеруден өтеді. Содан кейін ғана нұсқама беріліп, күзетілетін аумақ белгіленеді.

– Жедел әрекет ету тобының негізгі міндеті – жүктің қауіпсіз өтуін қамтамасыз ету, ұрлықтың алдын алу және адам өмірінің қауіпсіздігін сақтау. Қауіпті аймақтар – Кемпірсай, Ащысай, Жазық, Никельтау, Қандыағаш, Ақтөбе – алгоритмге сай бақыланады. Жүк пойыздары бекеттен бекетке жіті күзетпен жеткізіледі. Жүк вагондары қойылған аумақтарда күзет күшейтіледі, – дейді филиал жетекшісі.  

Жедел әрекет ету оңтайлы тобының басшысы Сәндібек Қауменов 2007 жылдан бері осы салада, 2018 жылдан топқа басшылық етеді. Оның айтуынша, ұрлық көрсеткіші соңғы кезде айтарлықтай төмендеген. Бұл – профилактикалық жұмыстардың нәтижесі. Мектептерде, оқу орындарында, қоғамдық орындарда түсіндіру жұмыстары жүргізіліп, заңсыз әрекеттердің жауапкершілігі туралы ақпарат беріледі.  

– Біз жылжымалы құраммен тасымалданатын барлық жүктің қауіпсіздігіне жауап береміз. Биыл вагондардан жүк ұрлығы тіркелген жоқ. Бірақ тепловоздардан дизель отыны ұрлануына қатысты 11 факт анықталып, 1 жанар-жағармай ұрлығы және 1 теміржолдың жоғары бөлшектерін ұрлау фактісі тіркелді,– деді топ басшысы.  

Топ суық қарумен жабдықталып, жаңа көліктермен қамтылған. Жргілікті желілік полиция бөлімдерімен бірлескен жұмыс жолға қойылған.