Ұрлық түбі – қорлық

Теміржол қоғалысына қызмет көрсететін әрбір бөлшек – жол қауіпсіздігінің кепілі. Оның біреуі істен шықса, қозғалысқа кедергі келтіріп, пойыздардың тоқтап қалуы, апаттық жағдайларға дейін жеткізуі мүмкін.

Сондықтан теміржолшылар теміржол мүлкін көздің қарашығындай сақтап, оның ұрлануының алдын алу бағытында профилактикалық жұмыстарды үнемі жүргізіп отырады. Жуырда Маңғыстау жол дистанциясы мамандары Маңғыстау желілік полиция бөлімінің және Әскерилендірілген теміржол күзетінің қызметкерлерімен бірлесіп Қарақия ауданы Жетібай станциясына жақын орналасқан елді мекендерге және станция қызметкерлеріне «Ұрлық түбі – қорлық» атты профилактикалық іс-шарасы жүргізілді.  

– Рейд барысында Мұнайлы ауданының Қызылтөбе және Маңғыстау ауылдық округтеріндегі темір қабылдайтын орындар тексерілді. Аталғандай орындарда еңбек етіп, нәпақасын тауып жүрген азаматтарға теміржолдың мүліктерін қабылдамау қажеттігі ескертілді. Егер тұрғындар теміржолға қатысы бар деген күдікті металл бұйымдарын алып келіп, тапсырмақ болса, дереу тиісті сала мамандарына хабар беріп, теміржол қауіпсіздігін сақтауға атсалысуға шақырды, – дейді бұл туралы Маңғыстау жол дистанциясының жетекші жол инженері Мұхтар Кульчанбаев.  

Сонымен қатар ұрлық-қарлық фактісі кездескен немесе оның куәгері болған жағдайда қандай әрекет істеу керектігі де жан-жақты түсіндірілген. Дистанция мамандары жергілікті тұрғындар мен темір қабылдайтын орталықтардың иелеріне теміржолдың мүлкіне қызығушылық танытпауды, оңай олжа іздеп, темір жолмен қатынайтын қаншама тағдырды тәлкекке салмауды сұрайды. Ұрлық соңы қорлыққа жеткізетінін, заңмен қадағаланып, қылмыстық жауапкершілікке тартылатынын ескертеді.