Өскемен-1 вокзалы жаңартудан кейін ашылды
Шығыс Қазақстан облысында жаңартудан кейін Өскемен-1 станциясының теміржол вокзалы ашылды. Салтанатты шараға «Самұрық-Қазына» АҚ Басқарма Төрағасы Нұрлан Жақыпов, Шығыс Қазақстан облысының әкімі Нұрымбет Сақтағанов, «Қазақстан темір жолы» ҰК» АҚ Басқарма Төрағасы Елжас Отыншиев, теміржол саласының ардагерлері Александр Степура және ардагерлер кеңесінің төрағасы Қырықбай Әлсейітов қатысты, деп хабарлайды Rail-news.kz.
Вокзал жайлылыққа, қауіпсіздікке және жолаушылар ағынын ұйымдастыруға қойылатын заманауи талаптарға жауап беретін жаңа ғимаратқа ие болды.
Бұрынғы вокзал ғимараты 1938 жылы салынған. Зерттеуден кейін оны бөлшектеу және жаңа нысан салу туралы шешім қабылданды. Жаңарту аясында заманауи ғимарат тұрғызылып, инженерлік желілер мен коммуникациялар жаңартылды, ішкі және сыртқы әрлеу жұмыстары жүргізілді. Сондай-ақ перрон қайта жаңартылып, іргелес аумақ абаттандырылды.
Бүгінде Өскемен-1 вокзалы тәулігіне 2 мыңнан астам жолаушыға қызмет көрсетеді. Станция арқылы Өскеменді Астана, Алматы, Аягөз, Жезқазған, Қарағанды және Достықпен байланыстыратын 12 жолаушылар пойызы өтеді.
Вокзалды қайта жаңарту Мемлекет басшысының тапсырмасы бойынша еліміздің теміржол вокзалдарын жаңарту бағдарламасы аясында жүргізілді.
Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Шығыс Қазақстан облысы әкімдігінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.
Жаңартылған вокзал жолаушылар мен теміржол қызметкерлері үшін ыңғайлы және қауіпсіз жағдай жасалған заманауи жолаушылар кеңістігіне айналды.
