Алматы және Қызылорда өңірлерінде «Қауіпсіз өткел» акциясы өтті
Алматы және Қызылорда өңірлерінде «Қауіпсіз өткел» республикалық профилактикалық акциясы жалғасуда. Іс-шараларды «Заң мен тәртіп» тұжырымдамасын іске асыру шеңберінде «ҚТЖ» ҰК» АҚ өткізеді және теміржол өткелдеріндегі қауіпсіздікті арттыруға бағытталған, деп хабарлайды Rail-news.kz.
Алматы өңірінде теміржолшылар полиция қызметкерлерімен бірлесіп Жетіген – Қайрат және Ақсеңгір – Бұрундай өткелдерінде рейдтер өткізді. 60-тан астам жүргізуші темір жолдарды қауіпсіз кесіп өту ережелері және оларды бұзғаны үшін жауапкершілік туралы түсініктеме алды.
Акцияға қатысушылар жүргізушілерге дабыл талаптарын сақтау, тыйым салу сигналы кезінде өтпеу қажеттігін еске салды. Пойыздың тежеу жолы бір шақырымға жетуі мүмкін екендігіне ерекше назар аударылды, сондықтан құрамды бірден тоқтату мүмкін емес.
Қызылорда өңірінде Қамбаш – Шөміш және Төретам – Ақжар өткелдерінде, сондай-ақ Тереңөзек станциясы ауданында профилактикалық іс-шаралар өтті.
Тереңөзек станциясының 2770-ші шақырымындағы өткел осы учаскедегі қозалысы ең тығыз болып табылады. Ол арқылы сағатына 50 жуық автомобиль, оның ішінде ауылшаруашылық өнімдерін тасымалдайтын жүк көлігі өтеді. Мұнда қозғалыс тәулік бойы жүзеге асырылады.
Қызылорда дистанциясының теміржолшылары жүргізушілермен түсіндіру жұмыстарын жүргізіп, ақпараттық жадынамалар таратып, қауіпсіз жол жүру ережелерін еске салды. Бұған дейін осындай рейдтер Байгеқұм, Бесарық және Шорнақ станцияларының өткелдерінде болған.
Профилактикалық іс – шараларды Қазалы жол дистанциясының теміржолшылары Қазалы станциясының өткелінде және Төретам – Ақжар станцияларының маңындағы өткелдерде, сондай-ақ Қамыстыбас – Шөміш аралығының 2445-ші және 2593-ші километрінде жүргізді.
Жүргізушілерге теміржол өткелдерінде жүру ережелерін бұзу Қазақстан Республикасының Әкімшілік құқық бұзушылық туралы кодексінің 607-бабына сәйкес әкімшілік жауаптылыққа әкеп соғатынын еске салды.
«Қауіпсіз өткел» акциясы бүкіл ҚТЖ желісінде жалғасуда. Оның басты мақсаты – өткелдердегі жол-көлік оқиғаларының алдын алу және жүргізушілердің қауіпсіздік талаптарына жауапкершілікпен қарауын қалыптастыру.