Ел шығысындағы теміржолшылар қауымы Тәуелсіздіктің 30 жылдық мерейтойына орай спорттық шаралардың көрігін қыздыруда. Бұл жолы желі бойындағы мекемелер арасында волейболдан жарыс өткізіп, ең мықтыларды анықтады. Ерлер арасында ұйымдастырылған бөлімше біріншілігіне барлығы 8 команда қатысты. Әуелгі кезекте өзара шеберлік сынасқан командалар арасынан үздік деп танылған қос команда суырылып алға шықты. Атап айтсақ, бірінші топтағы соңғы сайыста ПЧ-39 бен Транстелеком филиалының ойыншылары сынға түсіп, нәтижесінде жолшылар жеңіске жеткен болатын. Ал, екінші топ бойынша Семей станциясының ойыншылары Жаңа-Семей волейболшыларымен бәсекеге түсіп жеңіліп қалғанды. Үшінші орын үшін тартысқа толы бәсекеде Транстелеком мен Семей станциясының спортшылары өзара қарымта байқасты. Екі партиядан тұратын ойын барысы өте шиеленісті өрбіп, қарсыластар алма-кезек ұпай қоржынын толтырып отырды. Әйтсе де, ойынның соңғы сәттерінде бабы келіскен транстелекомдықтар басым түсіп, жеңіп кетті. Ал, алғашқы екі орынды анықтау үшін сынға түскен ПЧ-39-бен Жаңа-Семей волейболшылары тартысты ойын өрнегін көрсетті. Алайда, зал толы қызуқанды жанкүйерлерінің ұраны дем берген болуы керек, Семей жол дистанциясының ойыншылары екінші кезеңде шабуылды үдетіп, ұпай санын еселеп алды. Осылайша, қарсыластарын ойсырата жеңіп, бірінші орынға ие болды. Ойын нәтижесінде Жаңа-Семей екінші орын алса, Транстелеком филиалы жүлделі үшінші орынды қанағат тұтты. Тәуелсіздік мерейтойына орай ұйымдастырылатын спорттық сайыстар қатары әлі алда. Сондықтан, бөлімше біріншілігі үшін өткізілетін жарыстарға қатысу мақсатында барлық мекемелердің спортты серік ететін теміржолшылары әр демалыс күндерін жаттығумен өткізуде. Әрине, бабы келіскеннің қашан да басым түсетіні белгілі.