Қызылордалық теміржолшылар арасында шағын футболдан жарыс өтті
Қызылорда облысы бойынша меншікті тілші
ҚР тәуелсіздігінің 30 жылдығы құрметіне шағын футболдан жарыс өткізген қызылордалық теміржолшылар көрерменге көтеріңкі көңіл күй мен жақсы демалыс сыйлады. Жарыста аймақтағы мекемелердің жеті командасы қатысты. Қарсылас құраманың осал тұсын дөп табатын «ДС Белкөл» командасының үздік шабуылшысы Әлібек Тәжібаевтың шеберлігіне тәнті болған көпшілік қарсыласынан техникалық шеберлігімен айласын асыратын Қызылора жол дистанциясы құрамасының үздік ойыншысы Қыналы Санжарға қол соқты. Сондай-ақ, қақпаға бағытталған доптың басым бөлігін нысанаға жеткізбей кері қайтарған Электрмен жабдықтау дистанциясы құрамасының қақпашысы Жалғас Санболатов «үздік қақпашы» атанса, Қызылорда магистральдық желі бөлімшесі командасының қақпасына доп жақындатпаған Еркебұлан Сүлейменов «үздік қорғаушы» атанып, көрермендердің көзайымына айналды.
– Аймақтағы карантиндік ахуалға байланыс- ты спорттық шаралар онлайн форматында өткізіліп келді. Бүгін теміржолшылардың жеті құрама командасы теңбіл доптың бәсекесінен қыздырып, көрмендерге жақсы демалыс сыйлады деп ойлаймыз. Ойын барысында командалардың ереже бұзуы, қарсыластарына өктемдік жасау әрекеттері болған жоқ. Ойын талаптары толық сақталып, жоғары деңгейде өтті, – деді бөлімшенің спорт секторы Бақытжан Имбергенов.
Теңбіл доп додасының жеңімпаздарына «Қазкөліккәсіп» ҚБ Қызылорда филиалы мен мекемелердің кәсіподақ ұйымдарының демеушілігімен арнайы кубоктар, бағалы сыйлықтар мен грамоталар табысталды.