Қызылордада теміржолшылар арасыда волейболдан жарыс өтті
Қызылорда облысы бойынша меншікті тілші
Отан қорғаушылар күніне орай Қызылорда теміржолшылары волейболдан турнир өткізді. Алты мекеменің спортқұмар жастарынан жасақталған құрама командалар іріктеу кезеңін өткізіп, үздік шыққандар жүлделі орындарға таласты.
Кәсіби спортшылардан кем түспейтін Қызылорда локомотив пайдалану депосының «ТЧЭ-34» командасы, Қызылорда ЖТ бөлімшесі мен Қызылорда электрмен жабдықтау дистанциясының құрамалары теңбіл допты торда тулатып, өзара жүлделі орындарды бөлісті. Жалпы тартысты өткен турнирде қарсыластарынан ұпай санымен алға озған «НОД-ГП-10» құрамасы бірінші, «ЭЧ-25» екінші, ал «ТЧЭ-34» құрамасы 3-орынды иеленді. Жүлдегерлерге қомақты сыйлық берілсе, қалған үш команда ынталандыру сыйлығын алды.
Осы күні тағы бір спорт бәсекесін Қызылорда магистральдық желі бөлімшесінің кәсіподақ ұйымы ұйымдастырды. Бөлімшеге қарасты мекемелердің теміржолшыларынан жасақталған құрама командалардың бөлімшеішілік волейбол жарысы да тартысты өтті. Нәтижесінде Өрт сөндіру пойызының құрама командасы «Норпож» 3-орын, Магистральдық желі бөлімшесінің «НЖС» командасы 2-орын, Қызылорда қалпына келтіру пойызының «ВП» командасы жүлделі 1-орынды иемденіп, марапатқа ие болды.