Атырауда зейнеткерлер арасында дойбыдан бәсеке ұйымдастырылды
Атырау облысы бойынша меншікті тілші
Биыл елімізде ардагерлер ұйымының құрылғанына да 30 жыл толып отыр. Соған орай Атырау темір жолы мен кәсіподақ комитетінің ұйымдастыруымен ардагер-зейнеткерлер арасында дойбыдан жарыс өтті.
Бөлімше ардагерлері кеңесінің мұрындық болуымен сайысқа жол жөндеу, белгі беру-байланыс дистанциясы, локомотив және вагон деполары, қозғалыс шаруашылығы саласында еңбек еткен зейнеткерлер қатысты.
– Биыл Қазақстан теміржолшылары кәсіподағының құрылғанына отыз жыл, сонымен қатар республикалық ардагерлер кеңесінің құрылғанына да 30 жыл толып отыр екен. Соған орай дойбықұмар қарттарымыздың арасында жарыс өткізуді ұйғардық. Қарттарымыздың біразы келді, ойын ойнап, одан бөлек дастархан басында әңгіме-дүкен құрып, өткен-кеткенді айтысып мәре-сәре болды. Екі жылдай уақыт пандемияға байланысты мұндай шараларды өткізе алмадық. Енді алға қарай жалғастырамыз деген жоспарымыз бар, – дейді бөлімше ардагерлері кеңесінің төрағасы Хамидолла Айтимов.
Атырау магистральдық желі бөлімшесінің басшысы Елеубай Сапаров та ардагерлермен бірге болып, ойындарын тамашалап, қарияларды өлке темір жолында бүгінгі күні жасалып жатқан өзгерістерден хабардар етті. Айтуынша, дойбы ойнай білу де өнер. Бүгінде оны тек осындай көнекөз қарттар ғана дұрыс ойнайтын болды, бүгінгі ойында оған тағы да көз жеткізген.
Сайыс қорытындысы бойынша жүлделі 1-орынды бұрынғы локомотивші Асқар Жүгенбаев, 2-орынды диспетчер болған Мәлік Бисенғалиев иеленсе, 3-орынды байланыс саласында істеген Роза Өтеғалиева мен Нурадин Кабдиров өзара бөлісті. Жүлделі орын иелеріне арнайы сыйлықтар беріліп, басқа қатысушылар да сый-сияпатсыз қалмады.