Маңғыстау теміржолшылары арасында футболдан іріктеу ойындары жалғасып жатыр
Маңғыстау облысы бойынша меншікті тілші
Маңғыстау теміржолының үздік футболшыларын анықтау үшін алдын ала іріктеу ойындары жалғасуда. Жуырда теміржолшылар кәсіби одағының қолдауымен Ұлттық компанияның және кәсіподақтың мерейтойларына арналған кезекті сайыс өтті, деп хабарлайды Rail-news.kz.
Расында осы жылы спорттық шаралардың, оның ішінде шағын футбол жарыстарының көп ұйымдастырылуы түбектік теміржолшыларды жартылай футболшыға айналдырып жібергендей. Сондықтан да болар, соңғы жарыстар кәнігі ойыншылардың ойынынан бір де кем болмады. Бұл жолы да әбден ширап, жақсы жаттыққан командалар бір-біріне дес бермей ұзақ аңдысты. Ойын сонысымен де қыза түсті. Локомотив, вагон деполары мен станцияның, жол шаруашылығы мен байланыс саласының «сен тұр, мен атайын» деген кіл мықтыларынан құралған сегіз команда қатысты. Таңғы тоғызда басталған жарыс қас қарайғанға дейін созылды.
– Бұл жолғы сайыс өте тамаша, жоғары деңгейде өткен ойын болды. Жанкүйерлер де ойынның қызығына кіріп кеткені сонша, күні бойы алаңнан алысқа ұзамай аңысын аңдумен болды. Сегіз команданың бәрі де жақсы ойнады. Бірнеше айдан бері өтіп жатқан жарыстар шынымен кіл мықтыларды іріктепті. Дегенмен, «жүйріктен жүйрік озар жарысқанда» демекші, Маңғыстау белгі беру және байланыс дистанциясының командасы қарсыластарын түгел жеңіп, жүлделі бірінші орын алды. Екінші орынды Маңғыстау локомотив депосының командасы, ал үшінші орынды «Вагонсервис» мекемесінің жігіттері иемденді. Жеңімпаздар кәсіподақ ұйымының атынан ақшалай сыйлық, кубок, дипломмен марапатталды, – дейді Маңғыстау теміржолшыларының спорт нұсқаушысы Нұрайна Қыдырова.